ក្រុមហាម៉ាស បានច្រានចោលកិច្ចព្រមព្រៀងឈប់បាញ់បណ្តោះអាសន្ន និងកិច្ចព្រមព្រៀងដោះដូរ ចំណាប់ថ្នូរ ដោយនិយាយថា ខ្លួនមិននិយាយអំពីអ៊ីស្រាអែលដកខ្លួនចេញពីតំបន់ហ្កាហ្សាស្ទ្រីបទេ។ នេះបើយោងតាម China Media Group (CMG) កាលពីយប់ថ្ងៃសុក្រ។

លោក Osama Hamdan សមាជិកការិយាល័យនយោបាយរបស់ក្រុមហាម៉ាស បាននិយាយថា កិច្ចព្រមព្រៀងនេះ គឺគ្មានប្រសិទ្ធភាព និងមិនធ្ងន់ធ្ងរ ហើយការពិភាក្សាដែលពាក់ព័ន្ធ គឺមិនសមហេតុសមផលនោះទេ។

មន្ត្រីជាន់ខ្ពស់ក្រុមហាម៉ាសរូបនេះ បានកត់សម្គាល់ថា កិច្ចព្រមព្រៀងដែលបានមកពីកិច្ចចរចា ៤ភាគីមិនបានបំពេញតាមតម្រូវការដើម ដែលជាបទឈប់បាញ់ពេញលេញរបស់អ៊ីស្រាអែល និងការបញ្ឈប់ទាំងស្រុងនៃការឈ្លានពានចំពោះប្រជាជនប៉ាឡេស្ទីន។ លោកបាននិយាយថា ទាហានអ៊ីស្រាអែល ត្រូវដកចេញពីតំបន់ហ្កាហ្សា។

លោក Hamdan បានសង្កត់ធ្ងន់ថា ប្រសិនបើកិច្ចពិភាក្សានោះ បានចាត់ទុកទាមទាររបស់ក្រុមហាម៉ាសសំខាន់នោះ ក្រុមហាម៉ាស បើកចំហចំពោះសំណើជាបន្តបន្ទាប់ បើមិនដូច្នេះទេ វាជាការខ្ជះខ្ជាយពេល    វេលា។

លោក David Barnea ប្រធានទីភ្នាក់ងារស៊ើបការណ៍សម្ងាត់ Mossad របស់អ៊ីស្រាអែលកាលពីថ្ងៃសុក្របានប្រាប់សាច់ញាតិរបស់ចំណាប់ខ្មាំងអ៊ីស្រាអែលថា ក្រុមហាម៉ាស មិនបានបដិសេធសំណើរបស់អេហ្ស៊ីបទេ ហើយត្រូវបានគេរំពឹងថា នឹងឆ្លើយតបនៅសប្តាហ៍ក្រោយ។

តំណាងមកពីប្រទេសកាតា អេហ្ស៊ីប សហរដ្ឋអាមេរិក និងអ៊ីស្រាអែល បានប្រមូលផ្តុំគ្នានៅទីក្រុង Doha សម្រាប់កិច្ចចរចាសន្តិភាព ក្នុងសប្តាហ៍នេះ។