​អា​ហ្វ​ហ្គា​នី​ស្ថាន៖ មន្ត្រី​តា​លី​បង់​បាន​និយាយ​ថា អ្នក​បំផ្ទុះ​គ្រាប់បែក​អត្តឃាត​បាន​វាយប្រហារ​លើ​វិហារអ៊ីស្លាម​និកាយ​ស៊ី​អ៊ី​ត​មួយ​កន្លែង ដែល​មាន​អ្នក​គោរ​ពបូជា​ចូលរួម​អធិដ្ឋានកាលពី​ថ្ងៃសុក្រ ​នៅ​ភាគ​ខាងត្បូង​ប្រទេស​អា​ហ្វ​ហ្គា​នី​ស្ថានបណ្តាល​ឲ្យ​មនុស្ស​យ៉ាងតិច ​៤៧​នាក់​ស្លាប់ និង​របួស ​៧០​នាក់​។ វា​ជា​ថ្ងៃ​ដែល​មាន​មនុស្ស​ស្លាប់​ច្រើន​បំផុត​ ចាប់​តាំង​ពី​ការ​ដក​ទ័ព​សហរដ្ឋអាមេរិក​ចេញពី​ប្រទេស​នេះ​។

មិន​ទាន់​មាន​ការ​អះ​អាង​ភ្លាមៗ​អំពី​ការ​ទទួលខុស​ត្រូវ​ ចំពោះ​ការវាយប្រហារ​អត្តឃាត​នៅ​វិហារ​អ៊ីស្លាម Fatimiya ក្នុង​ខេត្ត Kandahar នៅ​ឡើយ​។ ការវាយប្រហារ​នេះ​បាន​កើត​ឡើង​មួយ​សប្តាហ៍ បន្ទាប់ពី​ការ​បំផ្ទុះ​គ្រាប់បែក​ដែល​អះអាង​ដោយ​សម្ព័ន្ធ​ភាព​ក្រុម​រដ្ឋ​អ៊ីស្លាម​ក្នុង​តំបន់ ដែល​បាន​បណ្តាល​ឲ្យ​មនុស្ស​ស្លាប់ ៤៦​នាក់​នៅ​វិហារ​អ៊ីស្លាម​និកាយ​ស៊ី​អ៊ី​ត​នៅ​ភាគ​ខាងជើង​ប្រទេស​អា​ហ្វ​ហ្គានី​ស្ថាន​។ ប្រធាន​មន្ទីរ​សុខាភិបាល​ខេត្ត Kandahar លោក​ Mawlavi Hafez Abbas បាន​និយាយ​ថា ​មនុស្ស​ជាង ៤៧​នាក់​បាន​ស្លាប់ និង​យ៉ាងតិច ៧០​នាក់​រង​របួស​នៅ​ក្នុង​ការវាយប្រហារ​នេះ​។ ក្រុម​និកាយ​ស៊ី​អ៊ី​ត​នៃ​ក្រុម​ Ahl al-Bayt ដែល​ជា​សង្គម​សាសនា​ពិភពលោក​បាន​ថ្កោលទោស​ការ​វាយ​ប្រហារ​នៅ​ទីក្រុង ​Kandahar ​ដោយ​ចោទប្រកាន់​កងកម្លាំង​សន្តិសុខ​នៅ​អា​ហ្វ​ហ្គា​នី​ស្ថាន​ថា ​គ្មាន​សមត្ថភាព​ក្នុង​ការ​ដោះស្រាយ​ការវាយប្រហារ​បែបនេះ​។​

​ក្រុម​រដ្ឋ​អ៊ីស្លាម​បាន​អះអាង​ពី​ការ​បំផ្ទុះ​គ្រាប់បែក​សម្លាប់​មនុស្ស​ជាច្រើន​នៅទូទាំង​ប្រទេស ចាប់​តាំង​ពី​ក្រុម​តា​លី​បង់​បាន​ដណ្តើម​អំណាច​កាលពី​ខែ​សីហា ក្នុង​ពេល​មានការ​ដក​ទ័ព​សហរដ្ឋអាមេរិក​ចេញ​។ ក្រុម​នេះ​បាន​កំណត់​គោលដៅ​ទៅលើ​អ្នក​ប្រយុទ្ធ​ក្រុម​តា​លី​បង់ ក្នុង​ការ​វាយប្រហារ​ទ្រង់​ទ្រាយ​តូច​ៗ​៕

អត្ថបទ៖ ប៊ុនថន