ទូរទស្សន៍រដ្ឋកូរ៉េខាងជើង KRT រាយការណ៍កាលពីថ្ងៃសៅរ៍ថា រដ្ឋមដន្រ្តីក្រសួងការបរទេសកូរ៉េខាងជើង និងរុស្ស៊ី បានបញ្ជាក់ឡើងវិញពីការប្តេជ្ញាចិត្តរបស់ពួកគេចំពោះការអនុវត្តបទប្បញ្ញត្តិដែលបានព្រមព្រៀងកាលពីខែមិថុនារវាងមេដឹកនាំប្រទេសទាំង ២ ។

 រដ្ឋមន្រ្តីការបរទេសរុស្ស៊ីលោកស្រី Choe Son Hui និងសមភាគីរុស្ស៊ីលោក Sergei Viktorovich Lavrov បានជួបពិភាក្សាការងារនៅក្នុងទីក្រុងម៉ូស្គូ ស្របពេលកើតមានក្តីកង្វល់ពីការជាប់ព័ន្ធរបស់ទីក្រុងព្យុងយ៉ាងនៅក្នុងសង្រ្គាមអ៊ុយក្រែន ។

 លោកស្រី Choe បាននិយាយប្រាប់លោក Lavrov ថា ទំនាក់ទំនងមិត្តភាពជាប្រវត្តិសាស្រ្តប្រពៃណីរបស់ពួកយើងដែលបានធ្វើដំណើរតាមមាគ៌ាសាកល្បងប្រវត្តិសាស្រ្ត កំពុងកើនឡើងដល់កម្រិតថ្មីនៃទំនាក់ទំនងសមមិត្តយោធាមិនអាចកាត់ថ្លៃបាន ហើយលោកស្រីបានកើតសរសើរដល់តួនាទីរបស់មេដឹកនាំកូរ៉េខាងជើងលោក Kim Jong Un និងប្រធានាធិបតីរុស្ស៊ីលោក Vladimir Putin ។

 លោកស្រីថា ទីក្រុងព្យុងយ៉ាងគ្មានការសង្ស័យឡើយក្រោមការដឹកនាំដ៏ឈ្លាសវៃរបស់លោក Putin ថា កងទ័ពរុស្ស៊ី និងប្រជាជនរុស្ស៊ី នឹងសម្រេចបានជ័យជំនះដ៏អស្ចារ្យនៅក្នុងការតស៊ូពលីកម្មរបស់ពួកគេ ដើម្បីការពារសិទ្ធិអធិបតេយ្យភាព និងផលប្រយោជនសន្តិសុខរដ្ឋរបស់ពួកគេ ។

 លោកស្រី Choe និយាយទៀតថា ពួកយើងសូមធ្វើការធានាផងដែរថា រហូតដល់ថ្ងៃជ័យជំនះ ពួកយើងនឹងឈរខាងសមមិត្តរុស្ស៊ីរបស់ពួកយើង ។

 ពេលស្វាគមន៍លោកស្រី Choe លោក Lavrov បាននិយាយពីទំនាក់ទំនងជិតស្និតរវាងយោធាប្រទេសទាំង ២ ដោយលោកនិយាយថា នេះនឹងជំរុញពួកគេឲ្យដោះស្រាយការងារសន្តិសុខសំខាន់រួមគ្នា ។ 

 សូមបញ្ជាក់ថា អង្គការណាតូ បានចូលរួមជាមួយរដ្ឋាភិបាលកូរ៉េខាងត្បូង សហរដ្ឋអាមេរិក និងអ៊ុយក្រែនបញ្ជាក់ពីការបញ្ជូនទាហានរបស់កូរ៉េខាងជើងទៅកាន់ប្រទេសរុស្ស៊ី ដោយពួកគេនិយាយថា អង្គភាពយោធាកូរ៉េខាងជើង ត្រូវបានដាក់ពង្រាយទៅកាន់តំបន់ Kursk របស់រុស្ស៊ី ដែលជាប់ព្រំដែនជាមួយអ៊ុយក្រែន ៕