ប្រទេសចិន ដែលបាននិងកំពុងបញ្ចេញវិធានការមួយចំនួនដើម្បីជំរុញចំនួនប្រជាជនរបស់ខ្លួន បានកត់ត្រាការធ្លាក់ចុះបន្ថែមទៀតនៃការចុះបញ្ជីអាពាហ៍ពិពាហ៍សម្រាប់រយៈពេល ៩ខែដំបូងនៃឆ្នាំ២០២៤ នេះបើយោងតាមទិន្នន័យផ្លូវការពីក្រសួងកិច្ចការស៊ីវិល ដែលចេញផ្សាយនៅថ្ងៃសុក្រ (០១ វិច្ឆិកា)។

ទិន្នន័យបង្ហាញថា សម្រាប់រយៈពេល ៣ត្រីមាសដំបូងនៃឆ្នាំនេះ គូស្នេហ៍ចំនួន ៤,៧៤៧លាននាក់ បានចុះសំបុត្រអាពាហ៍ពិពាហ៍នៅទូទាំងប្រទេស។ នោះគឺជាការថយចុះចំនួន ៩៤៣.០០០នាក់ តាមការគណនារបស់សារព័ត៌មានរ័យទ័រ ធៀបនឹងឆ្នាំមុន។ នៅឆ្នាំ២០២៣ ការចុះបញ្ជីអាពាហ៍ពិពាហ៍ចំនួន ៥,៦៩០លាននាក់ ត្រូវបានកត់ត្រាសម្រាប់រយៈពេល ៩ខែដំបូង ដែលកើនឡើងពីឆ្នាំ២០២២។ 

កំណើននៃភាពមិនប្រាកដប្រជាផ្នែកសេដ្ឋកិច្ច និងថ្លៃចំណាយប្រចាំថ្ងៃដ៏ខ្ពស់ទូទាំងប្រទេសបានបង្ខំឱ្យគូស្វាមីភរិយាវ័យក្មេងជាច្រើនត្រូវពន្យារពេលរៀបអាពាហ៍ពិពាហ៍ ដោយនោះជាសញ្ញាដ៏លំបាកមួយសម្រាប់សមាជិកសភា ដែលបាននិងកំពុងជំរុញគោលនយោបាយដើម្បីបង្កើនចំនួនប្រជាជនដែលកំពុងធ្លាក់ចុះ។

ថ្មីៗនេះ ប្រទេសចិន បានកែប្រែសេចក្តីព្រាងច្បាប់មួយ ដែលធ្វើឱ្យកាន់តែងាយស្រួលសម្រាប់គូស្វាមីភរិយាក្នុងការចុះឈ្មោះរៀបអាពាហ៍ពិពាហ៍ ខណៈដែលការដាក់ពាក្យសុំលែងលះនឹងកាន់តែលំបាក និងតឹងតែង៕