អង់គ្លេស៖ សមាជិកសភាចក្រភពអង់គ្លេសលោក David Amess អាយុ ៦៩ឆ្នាំបានស្លាប់បន្ទាប់ពីត្រូវបានគេចាក់ជាច្រើនកាំបិត ក្នុងអំឡុងពេលជួបជាមួយអ្នកបោះឆ្នោតរបស់លោកនៅព្រះវិហារមួយកន្លែង នៅភាគខាងកើតប្រទេសអង់គ្លេស។ ជនសង្ស័យមានអាយុ ២៥ឆ្នាំត្រូវបានចាប់ខ្លួន។
តាមសេចក្ដីរាយការណ៍បានឲ្យដឹងថា បុរសម្នាក់បានដើរចូលទៅក្នុងវិហារ Belfairs Methodist ជាកន្លែងដែលលោក Amess កំពុងស្ថិតនៅទៅនោះ ហើយបានវាយប្រហារមកលើអ្នកនយោបាយរូបនេះ។ នគរបាលបាននិយាយថា លោក Amess ត្រូវបានព្យាបាលដោយក្រុមសេវាកម្មសង្គ្រោះបន្ទាន់ ប៉ុន្តែគួរឱ្យសោកស្តាយលោកបានទទួលមរណភាព។ បុរសវ័យ ២៥ឆ្នាំម្នាក់ត្រូវបានចាប់ខ្លួនភ្លាមៗ បន្ទាប់ពីមន្ត្រីបានមកដល់កន្លែងកើតហេតុលើបទសង្ស័យថាជាឃាតកម្ម ហើយកាំបិតមួយត្រូវបានរកឃើញ។ ទីភ្នាក់ងារបាននិយាយនៅក្នុងសេចក្តីថ្លែងការណ៍ដែលបានបង្ហោះនៅលើបណ្តាញសង្គមថា ឃាតកម្មលើលោក Amess ត្រូវបានប្រកាសថាជាឧប្បត្តិហេតុភេរវកម្ម ដោយការស៊ើបអង្កេតត្រូវបានដឹកនាំដោយទីបញ្ជាការភេរវកម្ម។
ក្រុមអ្នកស៊ើបអង្កេតបាននិយាយថា ពួកគេនឹងមិនស្វែងរកអ្នកពាក់ព័ន្ធផ្សេងទៀតទៅនឹងហេតុការណ៍នេះនោះទេ ហើយក៏គ្មានព័ត៌មានលម្អិតអំពីការជំរុញឱ្យមានការវាយប្រហារនេះដែរ ប៉ុន្តែប្រធានក្រុមនគរបាលក្រោយមកបាននិយាយថា មន្ត្រីប្រឆាំងភេរវកម្មកំពុងដឹកនាំការស៊ើបអង្កេត៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
