អ៊ីស្រាអែល កាលពីថ្ងៃអាទិត្យ បានបន្តយុទ្ធនាការរបស់ខ្លួននៅក្នុងប្រទេសលីបង់ និងតំបន់ហ្កាហ្សា ដោយបើកការវាយលុកដ៏ខ្លាំងក្លាខណៈ នាយករដ្ឋមន្ត្រី លោក Benjamin Netanyahu បានចុះពិនត្យព្រំដែនភាគខាងជើងរបស់ប្រទេសលោក។

ក្រសួងសុខាភិបាលលីបង់ បាននិយាយថា ដំណើរទស្សនកិច្ចរបស់ លោក Netanyahu បានធ្វើឡើងបន្ទាប់ពីការវាយប្រហារតាមអាកាស សម្លាប់មនុស្សយ៉ាងហោចណាស់៣នាក់នៅជិតទីក្រុង Sidon ភាគខាងត្បូងប្រទេសលីបង់ និងខណៈគ្រាប់បែកកាន់តែច្រើនបានធ្លាក់លើភាគខាងកើតរបស់ប្រទេស។

ការិយាល័យរបស់លោក បាននិយាយនៅក្នុងសេចក្តីថ្លែងការណ៍ថា លោក Netanyahu បានប្រាប់កងទ័ពនៅព្រំដែនថា លោកចង់បញ្ជាក់ឱ្យច្បាស់ ដោយមានឬគ្មានកិច្ចព្រមព្រៀងក៏ដោយ គន្លឹះក្នុងការស្តារសន្តិភាព និងសន្តិសុខនៅភាគខាងជើង ទីមួយ សំខាន់បំផុតក្នុងវាយរុញច្រានក្រុមហេសបូឡា ឱ្យហួសពីទន្លេ Litani ហើយទីពីរ ត្រូវកំណត់គោលដៅនៃការប៉ុនប៉ងណាមួយក្នុងការផ្តល់អាវុធជាថ្មី និងទីបី ត្រូវឆ្លើយតបយ៉ាងម៉ឺងម៉ាត់ចំពោះសកម្មភាពណាមួយដែលបានធ្វើឡើងប្រឆាំងនឹងយើង។

ដំណើរចុះពិត្យព្រំដែនរបស់លោក Netanyahu បានធ្វើឡើងនៅពេលដែលយោធាអ៊ីស្រាអែល បាននិយាយថា មីស៊ីលជាង១០០គ្រាប់ត្រូវបានបាញ់ចេញពីប្រទេសលីបង់ ចូលទៅក្នុងទឹកដីអ៊ីស្រាអែលកាលពីថ្ងៃអាទិត្យ ប៉ុន្តែមីស៊ីលភាគច្រើនត្រូវបានស្ទាក់ចាប់ ហើយមួយចំនួន បានធ្លាក់នៅតំបន់ដែលគ្មានមនុស្សរស់នៅ។