ប្រជាជននៅជំរំ Nur Shams ក្នុងតំបន់កាន់កាប់ West Bank មានការព្រួយបារម្ភចំពោះអនាគតរបស់ពួកគេ បន្ទាប់ពីការវាយឆ្មក់របស់អ៊ីស្រាអែល បានធ្វើឱ្យខូចខាតដល់ទីភ្នាក់ងារអង្គការសហប្រជាជាតិសម្រាប់ការិយាល័យជនភៀសខ្លួនប៉ាឡេស្ទីន នៅទីនោះ។

ប្រជាជន ១៣.០០០នាក់នៅជំរំជិតទីក្រុង Tulkarem ភាគខាងជើង ពឹងផ្អែកយ៉ាងខ្លាំងលើទីភ្នាក់ងារផ្តល់ជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន។

ទីភ្នាក់ងារUNRWA បានដំណើរការសាលារៀនចំនួនពីរកន្លែង គ្លីនិក និងសេវាអនាម័យនៅទីក្រុង Nur Shams។

ជនភៀសខ្លួនដែលស្រឡាំងកាំង បានសំឡឹងមើល បុគ្គលិកបោសសម្អាតកម្ទេចកម្ទីថ្មនៅជុំវិញការិយាល័យ ដែលត្រូវបានបំផ្លាញស្ទើរតែទាំងស្រុងនៅក្នុងប្រតិបត្តិការ «ប្រឆាំងភេរវកម្ម» ។

លោក Hanadi Jabr Abu Taqa មន្ត្រីទីភ្នាក់ងារទទួលបន្ទុកនៅតំបន់ West Bank ភាគខាងជើង បាននិយាយថា «សម្រាប់ជនភៀសខ្លួន ពួកគេសំឡឹងមើលទៅទីភ្នាក់ងារ UNRWA ថាជាម្តាយរបស់ពួកគេ ដូច្នេះបានស្រមៃថាពួកគេ ត្រូវបាត់បង់ម្តាយ។

ប្រធានទីភ្នាក់ងារ UNRWA លោក Philippe Lazzarini បានស្តីបន្ទោសការបំផ្លិចបំផ្លាញនេះ លើកងកម្លាំងអ៊ីស្រាអែល ដោយនិយាយថាពួកគេបាន «ធ្វើឲ្យខូចខាតការិយាល័យយ៉ាងធ្ងន់ធ្ងរ»។

ប៉ុន្តែយោធា បានបដិសេធយ៉ាងម៉ឺងម៉ាត់ចំពោះការចោទប្រកាន់នេះ ដោយប្រាប់សារព័ត៌មាន AFP ថា ការខូចខាតនេះទំនងជាបង្កឡើងដោយគ្រឿងផ្ទុះដែលដាក់ដោយក្រុម «ភេរវករ»។