កម្ពុជាបាននិងកំពុងបន្តខិតខំជំរុញកិច្ចសហប្រតិបត្តិការផ្នែកសេដ្ឋកិច្ច និងពាណិជ្ជកម្ម រវាង​កម្ពុជា​ និងចិន ឱ្យឈានដល់កម្រិតថ្មីមួយ ទៀត, ជាពិសេសកិច្ចសហប្រតិបត្តិការផ្នែកសេដ្ឋកិច្ចឌីជីថល និង​ពាណិជ្ជកម្មតាមប្រព័ន្ធអេឡិចត្រូនិក ខណៈទំហំពាណិជ្ជកម្មប្រទេស ទាំងពីរ​បាន​កំពុង​មាន​និន្នាការ​កើន​ឡើងល្អប្រសើរ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្តី, រដ្ឋមន្ត្រីក្រសួងសេដ្ឋកិច្ច និង​ហិរញ្ញ​វត្ថុ និងជាអនុប្រធានបចាំការនៃក្រុម​ប្រឹក្សា​ជាតិសេដ្ឋកិច្ច និងសង្គមឌីជីថល លើកឡើងក្នុង «វេទិកា​សហប្រតិបត្តិការសេដ្ឋកិច្ចឌីជីថល ចិន-កម្ពុជា ឆ្នាំ ២០២៤» និង «ពិធី​សម្ពោធ​សមាគម​ឧស្សាហកម្ម​សេដ្ឋកិច្ចឌីជីថល ចិន-កម្ពុជា”នៅថ្ងៃទី ៤ ខែ វិច្ឆិកា នេះថា, ឆ្នាំ២០២៤ ជាខួប​លើក​ទី៦៦ នៃទំនាក់ ទំនងការទូត រវាងកម្ពុជា-ចិន ដែលជាឆ្នាំផ្លាស់ប្តូរប្រជាជន និងប្រជាជន ។ ជា​ការ​ពិត, «មិត្តភាពត្បូងពេជ្រ» រវាងកម្ពុជានិងចិន បានឆ្លុះ បញ្ចាំងឱ្យឃើញពីទំនាក់ទំនងដ៏ប្រសើរ រវាង​ប្រជាជាតិយើងទាំង ២ លើគ្រប់វិស័យ។

ចំណែក​ពាក់ព័ន្ធពាណិជ្ជកម្ម, ឯកឧត្តមអគ្គបណ្ឌិតសភាចារ្យ បន្តថា ជាក់ស្ដែងសម្រាប់រយៈពេល ៣ ត្រីមាស ដើមឆ្នាំ ២០២៤ នេះ, ទំហំពាណិជ្ជកម្ម រវាងកម្ពុជានិងចិន បានកើនដល់ប្រមាណ ៩,៨ ពាន់លានដុល្លារអាមេរិក, មានកំណើនប្រមាណ ១៣,២%, ធៀប នឹងរយៈ​ពេល​ដូច​គ្នា​ក្នុង​​ឆ្នាំ​២០២៣, ក្នុងនោះការនាំចេញពីកម្ពុជាទៅចិន មានទំហំប្រមាណ ១,២៧ ពាន់​លាន​ដុល្លារ​អាមេរិក​, មាន កំណើនប្រមាណ ២១% ធៀបនឹងឆ្នាំ ២០២៣; ខណៈដែល​ការ​នាំ​ចូល​ពី​ចិន​មក​កម្ពុជា​ ក្នុងរយៈពេលដូចគ្នា មានទំហំប្រមាណ ៨,៥២ ពាន់លានដុល្លារអាមេរិក, មានកំណើន​ប្រមាណ ​១២% បច្ចុប្បន្នកម្ពុជាបាននិងកំពុងបន្តខិតខំជំរុញកិច្ចសហប្រតិបត្តិការផ្នែកសេដ្ឋកិច្ច និង​ពាណិជ្ជកម្ម រវាងកម្ពុជានិងចិន ឱ្យឈានដល់កម្រិតថ្មីមួយទៀត។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន លើកឡើងបន្ថែមថា សម្រាប់កម្ពុជា ក្នុង​នីតិកាល​ទី៧ នៃរដ្ឋសភា រាជរដ្ឋាភិបាល, ក្រោមការដឹកនាំដ៏ត្រឹមត្រូវ,ស្វាហាប់, និងឈ្លាសវៃ ប្រកប​ដោយ​ចក្ខុ​វិស័យ​វែងឆ្ងាយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជា​ណា​ចក្រ​កម្ពុជា ជាអគ្គមគ្គុទ្ទេសក៍វ័យក្មេងដ៏ឆ្នើម និងពោរពេញដោយសមត្ថភាព, ចំណេះដឹង, និង​ថាមពល, បានដាក់ចេញ នូវយុទ្ធសាស្ត្របញ្ចកោណ-ដំណាក់កាល ទី ១ ដើម្បីកំណើន,ការងារ, សមធម៌, ប្រសិទ្ធភាព, និង ចីរភាព, ដោយផ្តោត ជាសំខាន់ លើរបៀបវារៈធានា «ប្រសិទ្ធ​ភាព​សមិទ្ធកម្ម​» តាមរយៈការអនុវត្តអភិក្រម «ឆ្លុះកញ្ចក់, ងូតទឹក, ដុសក្អែល, ព្យាបាល, និង វះកាត់» និង អភិក្រម «ជវភាពនៃប្រព័ន្ធតួអង្គតែមួយ» ។ យុទ្ធសាស្ត្របញ្ចកោណ-ដំណាក់​កាលទី ១ បានកំណត់យក អាទិភាពគន្លឹះ៥ គឺ៖ «មនុស្ស, ផ្លូវ, ទឹក, ភ្លើង, និង បច្ចេកវិទ្យា, ជា​ពិសេស គឺ បច្ចេកវិទ្យាឌីជីថល»; ក្នុងនេះបច្ចេកវិទ្យា, ពិសេសគឺបច្ចេកវិទ្យាឌីជីថល, ត្រូវ បាន​កំណត់​ជា​អាទិភាពគន្លឹះសម្រាប់ឆ្លើយតបទៅនឹងបដិវត្តឧស្សាហកម្មទី ៤.០ និងបរិវត្តកម្ម​ឌីជីថល​នៃ​សេដ្ឋកិច្ច និងសង្គមកម្ពុជា ក៏ដូច ជាឆ្លើយតបនឹងតម្រូវការ ក្នុងការលើក​កម្ពស់​ផលិត​ភាព​សេដ្ឋកិច្ចដែ​ល​ជាគ្រឹះ និងជាមធ្យោបាយដ៏សំខាន់ ក្នុងការសម្រេចបាននូវចក្ខុវិស័យ កម្ពុជា ឆ្នាំ ២០៥០ សំដៅប្រែក្លាយកម្ពុជា ទៅជាប្រទេសមានចំណូលខ្ពស់៕ អត្ថបទ៖ សុន រ៉ាឌី