ភ្នំពេញ​៖ ក្រសួងវប្បធម៌ និងវិចិត្រសិល្បៈ ថ្ងៃទី១៧ ខែតុលា ឆ្នាំ២០២១នេះ បានប្រកាសបិទមហោស្រព ចាប៉ី ដងវែងទូទាំងប្រទេស ឆ្នាំ២០២១ ដោយទស្សនាការចាក់ផ្សាយមហោស្រពចាប៉ីដងវែង តាមរយៈហ្វេសប៊ុក ផ្លូវការរបស់ ក្រសួងវប្បធម៌ និងវិចិត្រសិល្បៈ នាវេលាម៉ោង២រសៀល។

បើតាមលោក ឈាង ឆដាភ័ក្ត្រ ប្រធានស្តីទីនាយកដ្ឋានសិល្បៈទស្សនីយភាព បានឲ្យដឹងថា មហោស្រព ចាប៉ីដងវែងទូទាំងប្រទេស ឆ្នាំ២០២១នេះធ្វេីឡេីងក្នុងគោលបំណងដើម្បីអភិរក្ស លើកស្ទួយ និងផ្សព្វផ្សាយ ដល់មហាជនឱ្យស្គាល់និងយល់ដឹងអំពីសិល្បៈចាប៉ីដងវែង។ ទោះបីជាប្រទេសកម្ពុជា កំពុងជួប ប្រទះ នឹងរោគ រាតត្បាតនៃជំងឺកូវីត-១៩ យើងក៏នៅតែបន្តកិច្ចការអភិរក្ស លើកស្ទួយ និងផ្សព្វផ្សាយសិល្បៈចាប៉ីដងវែង ដោយរៀប ចំមហោស្រពតាមរយៈអនឡាញ។ មហោស្រពនេះបានរៀបចំឡើងមាន ៣វគ្គក្នុងនោះ ៖ វគ្គទី១៖ តម្រូវឱ្យបេក្ខេជនផ្ញើស្នាដៃវីដេអូ ដើម្បីចូលរួមប្រកួតតាមរយៈអនឡាញ។ ក្នុងនោះបេក្ខជនចំនួន១៨រូប មកពី១៣រាជធានី-ខេត្ត បានដាក់ពាក្យដើម្បីចូលរួម។ វគ្គទី២៖ គឺជាវគ្គពាក់កណ្តាលផ្តាច់ព្រ័ត្រ បន្ទាប់ ពីបាន ធ្វើការវាយតម្លៃដាក់ពិន្ទុយ៉ាងយកចិត្តទុកដាក់ពីគណៈកម្មការមេប្រយោគនៅក្នុងវគ្គទី១រួចមក បេក្ខជន ចំនួន ១៥រូបត្រូវបានជ្រើសរើស។ វគ្គទី៣ ៖ គឺជាវគ្គផ្តាច់ព្រ័ត្រ មានបេក្ខជនចំនួន ៥រូប មកប្រឡង ផ្ទាល់ នៅនាយក ដ្ឋាន សិល្បៈទស្សនីយភាព ដោយតម្រូវឱ្យច្រៀងជាគូ ដោយចាប់ឆ្នោតរើសប្រធានបទដែលគណៈមេប្រយោគ ផ្តល់ជូន។

ទន្ទឹមគ្នានោះដែរឯកឧត្តម ស៊ីយ៉ុន សុភារិទ្ធ អគ្គនាយក នៃអគ្គនាយកដ្ឋានបច្ចេកទេសវប្បធម៌ និងជា សមាជិក គណៈ កម្មការរៀបចំមហោស្រពចាប៉ីដងវែងទូទាំងប្រទេស ឆ្នាំ២០២១ បានលើកឡើងថា ការបន្ត កិច្ចការពារថែរក្សា និងលើកតម្កើងមរតកវប្បធម៌អរូបីផ្នែកចាប៉ីដងវែងនេះ គឺជាកាតព្វកិច្ច ដែលមិន អាចអាក់ ខានបានបើទោះជានៅក្នុងកាលៈទេសៈណាក៏ដោយ ជាពិសេសនៅក្នុងស្ថានភាព បច្ចុប្បន្ននេះ។ នៅក្នុង របត់ ការងារ ថ្មីនេះ ទាំងក្រុមការងាររៀបចំមហោស្រព មន្ទីរវប្បធម៌រាជធានី-ខេត្ត អង្គការ សមាគម និងបេក្ខជន បានខិតខំព្យាយាមចូលរួមចំណែកយ៉ាងសកម្ម សំដៅធ្វើយ៉ាងណាឲ្យមហោស្រព ដ៏សំខាន់ នេះនៅតែបន្ត សកម្មភាព បានទៅដោយរលូន។ ជាប្រវត្តិសាវតា នៃអង្គ មហោស្រព សិល្បៈចាប៉ីដង វែង ចាប់ពីក្រោយ ទសតវត្ស ឆ្នាំ៩០ មកដល់បច្ចុប្បន្ននេះ គឺជាលើកទីមួយ ហើយ ដែល អង្គមហោស្រពសិល្បៈចាប៉ីដងវែង ប្រារព ធ្វើឡើង តែឯង ហើយ តាមលក្ខណៈអនឡាញជាលើកដំបូង ដោយពុំមានទម្រង់សិល្បៈ អាយ៉ៃ ខ្សែដៀវខ្សែ១ និងនិទាន រឿង ដែលជាសិល្បៈប្រភេទប្រជាប្រិយដូចគ្នាហើយធ្លាប់បាន ប្រារព្ធធ្វើរួមគ្នាតាំងពីឆ្នាំ១៩៩១រហូតមក បានចំនួន១២ លើករួចមកហើយ ដែលបានរៀបចំដោយអង្គភាព នាយកដ្ឋានសិល្បៈទស្សនីយភាព ។

ក្នុងពិធីបិទមហោស្រព ឯកឧត្តម សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ តំណាង ដ៏ខ្ពង់ខ្ពស់របស់លោកជំទាវ បណ្ឌិត សភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានថ្លែង ថា មហោស្រពចាប៉ីដងវែងនេះ មិនគ្រាន់ តែជា វេទិកាប្រកួតប្រជែងយកពានរង្វាន់នោះទេ ប៉ុន្តែគឺជា ទីកន្លែង ជួបជុំសិក្សាស្វែងយល់ ចែករំលែកបទពិសោធន៍ និងចំណេះដឹងផងដែរ។ ដូចនេះគោលដៅ សំខាន់នៃ ការរៀប ចំ មហោស្រព ចាប៉ីដងវែងទូទាំងប្រទេស គឺដើម្បីផ្តល់ឱកាសសិក្សាលើផ្នែកធនធានមនុស្ស និងបច្ចេកទេសនៃ ការសំដែងសិល្បៈផ្នែកចាប៉ី សំដៅ ពង្រឹងសមត្ថភាព និងលើកកម្ពស់សិល្បៈចាប៉ីដងវែង ដើម្បីបន្តការពារ ថែរក្សា និងលើកស្ទួយមរតកវប្បធម៌អរូបីមួយនេះឲ្យបានគង់វង្ស និងកាន់តែមាន ប្រជាប្រិយភាពនៅក្នុង ស្រទាប់ ប្រជាជន គ្រប់វ័យ ជាពិសេសក្នុងស្រទាប់យុវជន។ ឯកឧត្តម មានជំនឿយ៉ាងមុតមាំថា តាមរយៈ ការប្រារព្ធ មហោ ស្រព ចាប៉ីដងវែងទូទាំង ប្រទេស ឆ្នាំ២០២១នេះ ពិតជាអាចផ្តល់នូវសារប្រយោជន៍កាន់តែ ច្រើនថែមទៀតសម្រាប់ ជា បទពិសោធន៍ និងបាន រួម ចំណែកក្នុងការថែរក្សាការពារ ពង្រឹងនូវអត្តសញ្ញាណជាតិ លើក កម្ពស់វប្បធម៌ ប្រពៃណី និងទំនៀមទំលាប់ជាតិ សំដៅប្រែក្លាយព្រះរាជាណាចក្រកម្ពុជា ជាព្រះរាជាណាចក្រនៃវប្បធម៌ និង សូម ថ្លែងអំណរគុណយ៉ាងជ្រាលជ្រៅចំពោះអង្គការយូណេស្កូ ដែលបានចូលរួមជាមួយក្រសួងវប្បធម៌ និងវិចិត្រ សិល្បៈ ក្នុងការ រៀបចំ មហោ ស្រព ចាប៉ីដងវែង ឆ្នាំ ២០២១ នេះប្រកបដោយជោគជ័យ។

នៅចុងបញ្ចប់នៃមហោស្រព គណៈកម្មការបានរកឃើញជ័យលាភីចំនួន ០៣រូប ដែលមានសមត្ថភាព ច្នៃប្រឌិត និងប៉ិនប្រសប់ យ៉ាងពិតប្រាកដ នាឆ្នាំ២០២១នេះ។ ហើយពានរង្វាន់ និងជ័យលាភីនៃមហោស្រព ចាប៉ីដងវែងទូទាំងប្រទេស ឆ្នាំ២០២១ មានដូចខាងក្រោម៖

-ជ័យលាភីលេខ១ ទទួលបានពាន១ អមដោយទឹកប្រាក់ចំនួន ៦លានរៀល។

-ជ័យលាភីលេខ២ ទទួលបានពាន១ អមដោយ ទឹកប្រាក់ចំនួន ៤លានរៀល។

-ជ័យលាភីលេខ៣ ទទួលបាន ពាន១ អមដោយទឹកប្រាក់ចំនួន ២លានរៀល។

-ចំពោះជ័យលាភីលេខ៤ និងលេខ៥ ជាមួយគ្នា នេះ ផ្តល់ជូនប័ណ្ណកិត្តិយសដើម្បីជាការ លើកទឹកចិត្តជូនចំពោះបេក្ខជនពីររូបទៀត ផងដែរ៕ អត្ថបទ៖​រដ្ឋា