ក្រុមឧទ្ទាមហ៊ួទីនៅប្រទេសយេម៉ែន បាននិយាយកាលពីថ្ងៃអាទិត្យថា ពួកគេនឹងបន្តការបិទផ្លូវសមុទ្ររបស់ពួកគេប្រឆាំងនឹងនាវាអ៊ីស្រាអែល ជាការឆ្លើយតបទៅនឹង «ព័ត៌មានចារកម្ម» ទាក់ទងនឹងក្រុមហ៊ុនដឹកជញ្ជូនរបស់អ៊ីស្រាអែលដែលលក់ទ្រព្យសម្បត្តិរបស់ពួកគេ ទៅឲ្យក្រុមហ៊ុនផ្សេងទៀត។

ក្រុមហ៊ួទីដែលមានសម្ព័ន្ធភាពជាមួយអ៊ីរ៉ង់ បានអះអាងថា ពួកគេកំពុងបង្កើនការវាយប្រហាររបស់ពួកគេ ដើម្បីគាំទ្រក្រុមហាម៉ាស និងក្រុមហេសបូឡា ក្នុងការតស៊ូរបស់ពួកគេប្រឆាំងនឹងសកម្មភាពរបស់អ៊ីស្រាអែល នៅក្នុងតំបន់។

លោក Yahya Sarea អ្នកនាំពាក្យយោធានៃក្រុមនេះ បាននិយាយថា៖«ព័ត៌មានស៊ើបការណ៍ បញ្ជាក់ថា ក្រុមហ៊ុនជាច្រើនដែលប្រតិបត្តិការលើការដឹកជញ្ជូនតាមសមុទ្រមានទំនាក់ទំនងជាមួយសត្រូវរបស់អ៊ីស្រាអែល កំពុងធ្វើការ ដើម្បីលក់ទ្រព្យសម្បត្តិរបស់ពួកគេ និងផ្ទេរទ្រព្យសម្បត្តិរបស់ពួកគេពីការដឹកជញ្ជូន និងនាវាដឹកជញ្ជូនតាមសមុទ្រ ទៅឲ្យក្រុមហ៊ុនដទៃទៀត»។

លោក Sarea បាននិយាយនៅក្នុងសុន្ទរកថាតាមទូរទស្សន៍ថា ក្រុមហ៊ួទី នឹងមិនទទួលស្គាល់ការផ្លាស់ប្តូរកម្មសិទ្ធិណាមួយឡើយ ហើយបានព្រមានប្រឆាំងនឹងការសហការណាមួយជាមួយក្រុមហ៊ុនទាំងនេះ។

លោក Sarea ក៏បាននិយាយផងដែរថា ក្រុមហ៊ួទី នឹងបន្តដាក់ការបិទផ្លូវជើងទឹករបស់ពួកគេលើអ៊ីស្រា អែល ហើយនឹងកំណត់គោលដៅលើនាវាណាដែលជាកម្មសិទ្ធិ មានទំនាក់ទំនង ឬធ្វើដំណើរទៅកាន់ប្រទេសអ៊ីស្រាអែល។

លោកបានអះអាងថា ការបិទផ្លូវ នឹងបន្តរហូតដល់ «ការឈ្លានពាន ត្រូវបញ្ឈប់ ហើយការឡោមព័ទ្ធនៅតំបន់ហ្កាហ្សាស្ទ្រីប ត្រូវបានដកចេញ ហើយការឈ្លានពានលើប្រទេសលីបង់ ត្រូវបញ្ឈប់ផងដែរ»។