បាល់ទាត់៖ គ្រាប់បាល់ ១គ្រាប់របស់កីឡាករ ឈឿន គីមហ៊ុន បានជួយឲ្យក្រុមបាល់ទាត់ខេត្តបន្ទាយមានជ័យទទួលបានជ័យជម្នះលើក្រុមសៀមរាបអែហ្វស៊ី នឹងបានឡើងទៅក្រុមកោះកុងអេហ្វស៊ីនៅវគ្គពាក់កណ្ដាលផ្ដាច់ព្រ័ត្រនៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ ស្របពេលខេត្តកោះកុងបានយកឈ្នះក្រុមមន្ទីរអប់រំ យុវជន និងកីឡាខេត្តកំពង់ឆ្នាំងក្នុងលទ្ធផល ៩-១។
ជំនួបដ៏ជក់ចិត្តនៅកីឡដ្ឋានខេមបូឌាអ៊ែរវ៉េរវាងក្រុមសៀមរាបអេហ្វស៊ី និងខេត្តបន្ទាយមានជ័យ វគ្គទី១ ក្រុមទាំងពីរមិនអាចបំប៉ោងសំណាញ់ទីគ្នាបានឡើយ។ ចូលដល់វគ្គទី២ ក្រុមទាំងពីរបានបន្ដវាយសម្រុកគ្នារហូតដល់នាទី៧៤ កីឡាករ ឈឿន គីមហ៊ុន ធ្វើបានសម្រេច ១គ្រាប់ឲ្យខេត្តបន្ទាយមានជ័យដែលជាគ្រាប់ជ័យជម្នះតែម្ដង បន្ទាប់ពីក្រុមសៀមរាបអេហ្វស៊ីព្យាយាមវាយបកតែធ្វើមិនបានសម្រេច។ រីឯជំនួបវគ្គ ៨ក្រុមចុងក្រោយ ១គូទៀតនៅកីឡដ្ឋានស្ដាតចាស់វិញ ក្រុមកោះកុងអេហ្វស៊ីបានដាក់សម្ពាធខ្លាំងលើខេត្តកំពង់ឆ្នាំងរហូតរកបាន ៩គ្រាប់ជាបន្ដបន្ទាប់ដោយកីឡាករ វិច្ឆិការ ពៅ ៤គ្រាប់ម្នាក់ឯង, កីឡាករ សាន បូរ៉ា រកបាន ២គ្រាប់ ខណៈ ៣គ្រាប់ទៀត រកបានដោយកីឡាករ ប៉ែន បញ្ញាវឌ្ឍ, វិសាល ជៀន និង សើ រ៉ូហ្សា។ រីឯខេត្តកំពង់ឆ្នាំងវាយបកបានតែ ១គ្រាប់ប៉ុណ្ណោះដោយកីឡាករ យូ ទេះ។
យោងតាមរូបមន្ដប្រកួតដែលបានបែងចែកមុនការប្រកួតវគ្គ ៨ក្រុមចុងក្រោយ ដូច្នេះតាមរយៈជ័យជម្នះនេះបានធ្វើឲ្យខេត្តបន្ទាយមានជ័យឡើងទៅជួបក្រុមកោះកុងអេហ្វស៊ី នៅវគ្គពាក់កណ្ដាលផ្ដាច់ព្រ័ត្រដែលគ្រោងនឹងធ្វើការប្រកួតនាថ្ងៃទី២០ ខែតុលានេះនៅកីឡដ្ឋាន AEU Sport Park ដើម្បីប្រជែងកៅអីវគ្គផ្ដាច់ព្រ័ត្រនៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
