ក្រសួងការបរទេសរបស់ប្រទេសទួរគី បាននិយាយកាលពីថ្ងៃអាទិត្យថា ខ្លួនបានដាក់លិខិតមួយទៅកាន់អង្គការសហប្រជាជាតិ ដែលចុះហត្ថលេខាដោយប្រទេសចំនួន ៥២ និងអង្គការចំនួនពីរ ដោយអំពាវនាវឲ្យបញ្ឈប់ការផ្តល់អាវុធដល់អ៊ីស្រាអែល។

រដ្ឋមន្ត្រីការបរទេសទួរគី លោក Hakan Fidan បាននិយាយនៅក្នុងសន្និសីទសារព័ត៌មានមួយ ក្នុងទីក្រុង Djibouti ជាកន្លែងដែលលោក បានចូលរួមកិច្ចប្រជុំកំពូលនៃភាពជាដៃគូទួរគី-អាហ្វ្រិកថា៖«យើងបាន   សរសេរលិខិតរួមមួយច្បាប់¬¬ ដោយអំពាវនាវឲ្យប្រទេសទាំងអស់បញ្ឈប់ការលក់អាវុធ និងគ្រាប់រំសេវដល់  អ៊ីស្រាអែល។ យើងបានប្រគល់លិខិតដែលមានប្រទេសហត្ថលេខីចំនួន ៥៤ ទៅកាន់អង្គការសហប្រជាជាតិ កាលពីថ្ងៃទី ០១ ខែវិច្ឆិកា នេះ»។

លោក Fidan ដែលបានបន្ថែមថា លិខិតនោះ គឺជាគំនិតផ្តួចផ្តើមដែលធ្វើឡើងដោយប្រទេសទួរគីថា៖    «យើងត្រូវតែនិយាយឡើងវិញ នៅគ្រប់ឱកាស ដែលការលក់អាវុធទៅឲ្យអ៊ីស្រាអែល មានន័យថា ចូលរួមក្នុងអំពើប្រល័យពូជសាសន៍របស់ប្រទេសនេះ»។

កាលពីខែមុន ប្រធានាធិបតីទួរគី លោក រ៉េសិប តាយីប អឺដូហ្កាន់ ( Recep Tayyip Erdogan) បានអំពាវនាវឲ្យអង្គការសហប្រជាជាតិដាក់ទណ្ឌកម្មអាវុធ។