អាជ្ញាធរ កាលពីថ្ងៃអាទិត្យ (ទី៣ ខែវិច្ឆិកា) បាននិយាយថា អ្នកសារព័ត៌មានជនជាតិអាមេរិកដើមកំណើតអ៊ីរ៉ង់ម្នាក់ដែលធ្លាប់ធ្វើការឲ្យទូរទស្សន៍ផ្តល់មូលនិធិដោយរដ្ឋាភិបាលសហរដ្ឋអាមេរិកត្រូវបានគេជឿថា ត្រូវបានឃុំខ្លួនដោយប្រទេសអ៊ីរ៉ង់អស់រយៈពេលជាច្រើនខែមកហើយ ដោយបានបង្កើនឲ្យមានហានិភ័យកាន់តែខ្ពស់បន្ថែមទៀត ខណៈដែលទីក្រុងតេអេរ៉ង់គំរាមសងសឹក ចំពោះការវាយប្រហាររបស់អ៊ីស្រាអែលមកលើខ្លួន។

ការជាប់ពន្ធនាគាររបស់លោក Reza Valizadeh ត្រូវបានបញ្ជាក់ប្រាប់ទៅកាន់សារព័ត៌មាន Associated Press (AP) ដោយក្រសួងការបរទេសសហរដ្ឋអាមេរិក ខណៈដែលអ៊ីរ៉ង់ប្រារព្ធខួបលើកទី ៤៥ឆ្នាំនៃការសម្រុកចូលកាន់កាប់ស្ថានទូតអាមេរិក និងវិបត្តិចំណាប់ខ្មាំង កាលពីថ្ងៃអាទិត្យ។ 

ជាមួយគ្នានេះ ការឃុំខ្លួននេះក៏កើតមានឡើងបន្ទាប់ពីមានការគំរាមកំហែងរបស់មេដឹកនាំកំពូលអ៊ីរ៉ង់ លោក Ayatollah Ali Khamenei នៅមួយថ្ងៃមុននេះ ដែលថា នឹងផ្តល់ «ការឆ្លើយតបយ៉ាងធ្ងន់ធ្ងរ» ដល់អ៊ីស្រាអែល និងសហរដ្ឋអាមេរិក នៅពេលដែលយន្តហោះទម្លាក់គ្រាប់បែករយៈចម្ងាយឆ្ងាយ B-52 បានទៅដល់តំបន់មជ្ឈិមបូព៌ា ដែលជាការប៉ុនប៉ង ដើម្បីរារាំងទីក្រុងតេអេរ៉ង់។

គួរបញ្ជាក់ថា លោក Valizadeh បានធ្វើការឲ្យវិទ្យុ Farda ជាស្ថាប័នដែលគ្រប់គ្រងដោយទីភ្នាក់ងារសហរដ្ឋអាមេរិក សម្រាប់ប្រព័ន្ធផ្សព្វផ្សាយសកល។ កាលពីខែកុម្ភៈ រូបលោកបានសរសេរនៅលើវេទិការបស់បណ្ដាញសង្គម X ថា សមាជិកគ្រួសាររបស់លោកត្រូវបានឃុំខ្លួន ដោយធ្វើឡើង ក្នុងគោលបំណងឲ្យលោកត្រឡប់ទៅប្រទេសអ៊ីរ៉ង់វិញ៕