អាជ្ញាធរក្នុងរដ្ឋធានី និងតំបន់ជុំវិញរបស់ប្រទេសឥណ្ឌា បានចេញការផាកពិន័យដល់ម្ចាស់យានយន្តរាប់ពាន់គ្រឿង និងការដ្ឋានសំណង់ ជុំវិញការបំពានច្បាប់បង្កកខ្វក់ ដែលជាការប៉ុនប៉ងធ្វើឲ្យធ្លាក់ចុះគុណភាពខ្យល់ ក្នុងអំឡុងពេល ៣សប្តាហ៍ចុងក្រោយនេះ។

គួរបញ្ជាក់ថា ក្រុមហ៊ុនបច្ចេកវិទ្យាគុណភាពខ្យល់ (IQAir) របស់ប្រទេសស្វីស បានឲ្យដឹងថា នៅក្នុងតារាងចំណាត់ថ្នាក់របស់ខ្លួន New Delhi គឺជាទីក្រុងមានខ្យល់បរិកាសកខ្វក់ខ្លាំងជាងគេបំផុតរបស់ពិភពលោក។ 

មន្ត្រីរបស់ទីក្រុង បានប្រាប់ថា រថយន្តជិត ៦០.០០០គ្រឿង និងអគារជាង ៧.៥០០ខ្នង ត្រូវបានផាកពិន័យ ខណៈដែលក្រុមប្រឹក្សាត្រួតពិនិត្យការបង្កកខ្វក់កណ្ដាល (CPCB) បានវាយតម្លៃពីស្ថានភាពខ្យល់នៅថ្ងៃចន្ទនេះថា «អន់ណាស់» ដោយមានពិន្ទុ ៣៧៣ ពីសន្ទស្សន៍របស់វា ដែលវាយតម្លៃកម្រិតពីសូន្យដល់ ៥០ ជា «គុណភាពខ្យល់ល្អ»។

ជាមួយគ្នានេះ គណៈកម្មការសម្រាប់ការគ្រប់គ្រងគុណភាពខ្យល់ បាននិយាយថា យានយន្តចំនួន ៥៤.០០០គ្រឿង ខ្វះវិញ្ញាបនបត្រការបង្កកខ្វក់ក្រោមការគ្រប់គ្រង (PUC) ដែលបង្ហាញពីកម្រិតនៃការបំភាយដែលត្រូវបានអនុញ្ញាត ដោយបានបន្ថែមថា ជិត ៣.៩០០គ្រឿងទៀត ត្រូវបានរឹបអូសទុកថា «បំភាយហួសកម្រិតអនុញ្ញាត»។

សម្រាប់ទីតាំងសំណង់វិញ ការទូទាត់សំណងបរិស្ថាន ត្រូវបានបញ្ជាឲ្យបង់ចំនួន ៥៩៧កន្លែង ខណៈ ៥៦កន្លែងទៀត ត្រូវបានប្រាប់ឲ្យបិទ៕