ប្រទេសប្រជុំកោះប៉ាស៊ីហ្វិក គឺប៉ាឡូ ដែលមានសារៈសំខាន់ ចំពោះយោធាអាមេរិក ចំពេលមានភាពតានតឹងជាមួយប្រទេសចិន និងជាប្រទេសមួយស្ថិតក្នុងចំណោមសម្ព័ន្ធមិត្តរាប់សិបរបស់កោះតៃវ៉ាន់ ត្រូវរៀបចំការបោះឆ្នោតជាតិជ្រើសរើសប្រធានាធិបតី នៅថ្ងៃអង្គារ (ទី៥ ខែវិច្ឆិកា)។

ប្រធានាធិបតី លោក Surangel Whipps Jr កំពុងប្រកួតប្រជែងដណ្ដើមតំណែងនេះ ទល់នឹងប្អូនថ្លៃរបស់លោក គឺអតីតប្រធានាធិបតី លោក Tommy Remengesau ដែលបានឈរនៅឯផ្លូវបំបែកភ្លើងសញ្ញាចរាចរណ៍ នៅថ្ងៃចន្ទ (ទី៤ ខែវិច្ឆិកា) ដោយអំពាវនាវដោយផ្ទាល់ទៅកាន់អ្នកបើកបរឲ្យជួយគាំទ្ររូបលោក។ ជាមួយគ្នានេះដែរ អ្នកបោះឆ្នោតក៏នឹងជ្រើសរើសសមាជិកព្រឹទ្ធសភាចំនួន ១៣រូបផងដែរ។

ប្រទេសប៉ាឡូ នៅឆ្នាំនេះ បានបង្កើតឡើងវិញនូវកិច្ចព្រមព្រៀងសមាគមសេរី ជាមួយទីក្រុងវ៉ាស៊ីនតោន ជាកិច្ចសន្យាមួយដែលនឹងទទួលបានជំនួយសេដ្ឋកិច្ចចំនួន ៨៩០លានដុល្លារ ក្នុងរយៈពេល ២០ឆ្នាំ ជាថ្នូរនឹងការព្រមឲ្យយោធារបស់សហរដ្ឋអាមេរិកបន្តចូលទៅកាន់តំបន់ដែនសមុទ្រ ដែនអាកាស និងដែនគោករបស់ខ្លួន។

ប្រជាជនប៉ាឡូចំនួន ១៨.០០០នាក់ បានរស់នៅពាសពេញប្រជុំកោះដែលស្ថិតនៅចន្លោះប្រទេសហ្វីលីពីន និងមូលដ្ឋានយោធាអាមេរិក នៅកោះហ្គាំ។ យោធាអាមេរិកកំពុងសាងសង់រ៉ាដាពីលើមេឃលើប្រទេសកោះប៉ាឡូ ដែលគ្រោងនឹងបញ្ចប់នៅឆ្នាំ២០២៦។

ប៉ាឡូ គឺជាប្រទេសមួយក្នុងចំណោមប្រទេសចំនួន ១២ ដែលមានទំនាក់ទំនងការទូតជាមួយកោះតៃវ៉ាន់ ហើយលោក Whipps បាននិយាយថា ចំណាត់ការរបស់ចិន ក្នុងការរារាំងក្រុមអ្នកទេសចរមិនឲ្យធ្វើដំណើរទៅកាន់ប៉ាឡូ និងការវាយប្រហារតាមអ៊ីនធឺណិត នៅក្នុងខែមីនា គឺជាគំរូនៃការដាក់សម្ពាធពីសំណាក់ទីក្រុងប៉េកាំង ដើម្បីធ្កើឲ្យទំនាក់ទំនងផ្លាស់ប្ដូរ៕