ប្រជាពលរដ្ឋរស់នៅក្នុងរដ្ឋធានីញូវដែល្លី និងទីក្រុងម៉ុមបៃ ប្រទេសឥណ្ឌា នាំគ្នាត្អូញត្អែរពីបញ្ហាដកដង្ហើមនៅថ្ងៃចន្ទនេះ ស្របពេលគុណភាពខ្យល់កាន់តែអាក្រក់ខ្លាំង ដោយសារកង្វក់បរិយាកាសកើនឡើង ។

យោងតាមសន្ទស្សន៍គុណភាពខ្យល់ជាតិ បានឲ្យដឹងថា គុណភាពខ្យល់នៅក្នុងរដ្ឋធានីញូវដែល្លី ស្ថិតក្នុងកម្រិតចន្លោះពីធ្ងន់ធ្ងរខ្លាំង និងអន់ខ្លាំង ស្របពេលដែលរដ្ឋធានីប្រទេសឥណ្ឌាមួយនេះ គ្របដណ្តប់ដោយផ្សែងអ័ព្ទ ។

លោក Abhishek គឺជាពលរដ្ឋមួយរូបរស់នៅក្នុងរដ្ឋធានីញូវដែល្លី និយាយថា មនុស្សចាស់នៅក្នុងផ្ទះរបស់លោក ពិបាកដងដង្ហើមខ្លាំងណាស់ ហើយផ្សែងអ័ព្ទធ្វើឲ្យប៉ះពាល់ដល់ថ្ងៃរះផងដែរ ។

ដោយឡែក គុណភាពខ្យល់នៅក្នុងទីក្រុងម៉ុមបៃ ស្ថិតក្នុងកម្រិតចន្លោះពីអន់ ទៅមធ្យម ខណៈស្រទាប់ដ៏ក្រាស់របស់ផ្សែងអ័ព្ទគ្របដណ្តប់អគារ និងដងផ្លូវនៅក្នុងរដ្ឋធានីហិរញ្ញវត្ថុមួយនេះ ។

ញូវដែល្លី ដែលជាទីក្រុងមានពលរដ្ឋរស់នៅ ២០លាននាក់ គឺជារដ្ឋធានីមានកង្វក់បរិយាកាសដ៏អាក្រក់បំផុតនៅលើពិភពលោក ។ 

ចាប់ពីខែតុលាជារៀងរាល់ឆ្នាំ គុណភាពខ្យល់កាន់តែអាក្រក់ខ្លាំង ដោយសារកត្តាជាច្រើន រួមទាំងការដុតកាកសំណល់កសិកម្ម បន្ទាប់ពីប្រមូលផលរួច ផ្សែងរថយន្ត និងផ្សែងបង្កឡើងដោយសារការដុតផាវ អំឡុងពិធីបុណ្យសាសនាហិណ្ឌូ ៕