ក្រចេះ ៖ បន្ទាប់ពីមានភ្លៀងធ្លាក់ជាប់គ្នា ជាបន្តបន្ទាប់នៅក្នុងរយៈពេលប៉ុន្មានថ្ងៃចុងក្រោយ នេះ ដែល​បណ្ដាលមកពីឥទ្ធិពលនៃខ្យល់ព្យុះ និងប្រពន្ធ័សម្ពាធទាប ធ្វើអោយបណ្តាខេត្ត មួយចំនួន​នៅទូទាំងប្រទេសកម្ពុជារងផលប៉ះពាល់។

ជាក់ស្ដែងសម្រាប់ខេត្តក្រចេះ ក៏បានទទួលរងនូវផលប៉ះពាល់ពីឥទ្ធិពលនៃខ្យល់ព្យុះ និងប្រព័ន្ធ​សម្ពាធទាបនេះផងដែរ ដោយនៅថ្ងៃទី១៦-១៧ ខែតុលានេះ មានភ្លៀងធ្លាក់២ថ្ងៃ ២យប់ជាប់គ្នា បានបណ្តាលឲ្យមានការបាក់ស្រុតច្រាំងទន្លេមេគង្គ បង្កឲ្យខូចខាតផ្ទះ និងទ្រព្យសម្បត្តិ​របស់​ប្រជាពលរដ្ឋមួយចំនួនដែលនៅជាប់ និងច្រាំងទន្លេ ស្ថិតនៅត្រង់ចំណុច ភូមិធំ ឃុំសណ្ដាន់ ស្រុកសំបូរ ខេត្តក្រចេះ ប៉ុន្តែពុំមានការប៉ះពាល់ ឫរបួសស្នាមដល់​ប្រជាពលរដ្ឋណាម្នាក់​ឡើយ។

ទន្ទឹមនឹងនេះដែរ បើទោះបីជាខេត្តក្រចេះរងនូវឥទ្ធិពលពីខ្យល់ព្យុះ និងប្រព័ន្ធ សម្ពាធទាប​យ៉ាងនេះក្តី ចំពោះស្ថានភាពកម្ពស់ទឹកទន្លេមេគង្គនៅស្ថានីយជលសាស្ត្រក្រចេះ គិតត្រឹម​វេលា​ម៉ោង៧:០០នាទីព្រឹកថ្ងៃទី១៨ ខែតុលា ឆ្នាំ២០២១នេះ មានកម្ពស់ត្រឹមតែ ១៦.៣៣ម៉ែត្រ ឃើញថា មានកំរិតទាបជាងនៅឡើយ បើធៀបថ្ងៃខែដូចគ្នានឹងឆ្នាំ២០២០ មានកម្ពស់ទឹក ១៧.៧៥ម៉ែត្រ។

ដោយឡែក ចំពោះស្ថានភាពអាកាសធាតុនៅព្រឹកថ្ងៃដដែលនេះដែរ ផ្ទៃមេឃស្រឡះ មានពពក​ពីតិចទៅមធ្យម និងមានសីតុណ្ហភាព អតិបរិមាស្មើ 26.0°c និងអប្បបរិមាស្មើ 23.0°c ផងដែរ។

គួរបញ្ជាក់ថា ស្ថានភាពទឹកទន្លេមេគង្គក្រចេះ ហក់ឡើងតែមិនទាន់ហូរចូល អាងនូវឡើយដោយ​សារកំរឹតទឹកទន្លេមេគង្គនៅទាប កម្រិត​កម្ពស់ទឹកដែលអាចហូរចូលអាង ស្ដុកទឹក គឺចាប់ពី១៩ម៉ែត្រ​ឡើងទៅ ហើយចំពោះទឹកដែលបានឡើងនេះ គឺដោយសារមាន ភ្លៀងនៅខាងលើចំអាងមេគង្គ និងមានភ្លៀងធ្លាក់ក្នុងខេត្ត។

ជាមួយគ្នានោះ មន្ទីរធនធានទឹកខេត្ត ក៏បានណែនាំដល់សហគមន៍ប្រើប្រាស់ទឹក ឱ្យបិទបើកទឹក​ទៅតាមលក្ខណៈបច្ចេកទេស ប្រសិនបើ នៅកន្លែងណាដែលគ្មានទឹកគ្រប់គ្រាន់ សហគមន៍ ត្រូវបិទទឹកទុកក្នុងអាង ដើម្បីទុកធ្វើស្រែប្រាំង៕

អត្ថបទ ៖ សេង ម័រ