ឯកអគ្គរដ្ឋទូតអ៊ីរ៉ង់ប្រចាំទីក្រុងមូស្គូ នៅថ្ងៃចន្ទ (ទី៤ ខែវិច្ឆិកា) នេះ បាននិយាយថា រុស្ស៊ីនឹងបាញ់បង្ហោះផ្កាយរណបអ៊ីរ៉ង់ចំនួន២ ចូលទៅក្នុងគន្លងតារាវិថី តាមរយៈយានចម្លង Soyuz នៅថ្ងៃអង្គារ (ទី៥ ខែវិច្ឆិកា) ស្អែកនេះ ខណៈប្រទេសដែលត្រូវបានដាក់ទណ្ឌកម្មដោយសហរដ្ឋអាមេរិកទាំង២ ធ្វើឲ្យទំនាក់ទំនងវិទ្យាសាស្ត្ររបស់ពួកគេកាន់តែស៊ីជម្រៅ។

តាមរយៈការបង្ហោះ នៅលើបណ្ដាញសង្គម X ឯកអគ្គរដ្ឋទូតអ៊ីរ៉ង់ ប្រចាំរុស្ស៊ី លោក Kazem Jalali បានឲ្យដឹងថា៖ «ក្នុងការបន្តអភិវឌ្ឈកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យាអ៊ីរ៉ង់-រុស្ស៊ី ផ្កាយរណបអ៊ីរ៉ង់ចំនួន ២ គឺ Kowsar និង Hodhod នឹងត្រូវបាញ់បង្ហោះទៅកាន់គន្លងតារាវិថីចម្ងាយ 500 គីឡូម៉ែត្រ នៅថ្ងៃអង្គារ ទី៥ ខែវិច្ឆិកា ដោយយានចម្លង Soyuz»។

របាយការណ៍របស់ទីភ្នាក់ងារព័ត៌មានពាក់កណ្តាលផ្លូវការរបស់អ៊ីរ៉ង់ Tasnim បានឲ្យដឹងកាលពីខែមុនថា ការអភិវឌ្ឍលើ Kowsar ដែលជាផ្កាយរណបចាប់រូបភាពច្បាស់ល្អកម្រិតខ្ពស់ និង Hodhod ដែលជាផ្កាយរណបទំនាក់ទំនងខ្នាតតូច គឺជាកិច្ចខិតខំប្រឹងប្រែងដ៏សំខាន់លើកដំបូងរបស់វិស័យអវកាសឯកជនរបស់ប្រទេសអ៊ីរ៉ង់។

គួរបញ្ជាក់ថា រុស្ស៊ីបានបាញ់បង្ហោះផ្កាយរណបស្រាវជ្រាវពីចម្ងាយរបស់អ៊ីរ៉ង់ ឈ្មោះ Pars 1 ទៅក្នុងលំហអាកាស ក្នុងខែកុម្ភៈ ដោយប្រើរ៉ូកែត Soyuz ពីស្ថានីយបាញ់បង្ហោះ Vostochny Cosmodrome៕