អ្នកស្រុកបាននាំគ្នានិយាយថា អ្នកតាំងទីលំនៅជនជាតិជ្វីហ្វ នាថ្ងៃចន្ទ (ទី៤ ខែវិច្ឆិកា) នេះ បានដុតរថយន្តចំនួន ២០គ្រឿង ក្នុងអំឡុងពេលការវាយប្រហារលើទ្រព្យសម្បត្តិរបស់ប៉ាឡេស្ទីន នៅជាយក្រុង Ramallah ជាការវាយឆ្មក់មួយ ក្នុងចំណោមការវាយប្រហារដ៏ធ្ងន់ធ្ងរបំផុតរបស់ពួកគេ នៅក្នុងតំបន់ដែលនៅតែជាកន្លែងប្រើជាអាសនៈរបស់រដ្ឋាភិបាលប៉ាឡេស្ទីន ក្នុងតំបន់កាន់កាប់ West Bank។

អ្នកស្រុកទាំងនោះបាននិយាយថា អ្នកប្រហារវាយប្រមាណជា ១២នាក់ ដែលពាក់ម៉ាស់ និងកាន់គ្រាប់បែកសាំង បានកំណត់គោលដៅវាយប្រហារលើតំបន់ Al-Bireh ដែលនៅជាប់នឹងទីក្រុង Ramallah នៅវេលាម៉ោងប្រហែល ៣ទៀបភ្លឺ (ត្រូវនឹងម៉ោង ១ ម៉ោងសកល) ដោយបានដុតបំផ្លាញរថយន្តក្នុងរយៈពេលតែប៉ុន្មាននាទី។

ផ្នែកខាងមុខនៃអគារលំនៅឋានមួយខ្នងត្រូវបានងងឹតឈឹងដោយសារអគ្គិភ័យឆាបឆេះរថយន្ត ដែលចតនៅខាងក្រៅនោះ។ អ្នកនាំពាក្យនគរបាលអ៊ីស្រាអែល បានឲ្យដឹងនៅក្នុងសេចក្តីថ្លែងការណ៍ថា នគរបាលអ៊ីស្រាអែល និងទីភ្នាក់ងារសន្តិសុខ Shin Bet កំពុងស៊ើបអង្កេតករណីនេះ បន្ទាប់ពីទទួលបានរបាយការណ៍ថា រថយន្តរបស់ប្រជាជនប៉ាឡេស្ទីនមួយចំនួនត្រូវបានដុត។

គួរបញ្ជាក់ថា ការប្រព្រឹត្តិអំពើហិង្សារបស់អ្នកតាំងលំនៅជនជាតិជ្វីហ្វ ប្រឆាំងនឹងសហគមន៍ប៉ាឡេស្ទីន នៅតំបន់ West Bank បាននាំឲ្យមានការថ្កោលទោសជាអន្តរជាតិ និងការដាក់ទណ្ឌកម្មលើអ្នកតាំងលំនៅដែលបង្កអំពើហិង្សា ពីសំណាក់រដ្ឋាភិបាលមួយចំនួន ជាពិសេសសហរដ្ឋអាមេរិក ដែលបានជំរុញឲ្យអ៊ីស្រាអែលធ្វើអ្វីបន្ថែមទៀត ដើម្បីបញ្ឈប់ការវាយប្រហារផ្សេងទៀត៕