ក្រសួងហិរញ្ញវត្ថុរបស់ទីក្រុងសេអ៊ូល បានប្រាប់ឲ្យដឹងថា មន្ត្រីរាប់រយនាក់មកពីប្រទេសកូរ៉េខាងត្បូង ធនាគារពិភពលោក និងប្រទេសកំពុងអភិវឌ្ឍន៍ បានជួបប្រជុំគ្នា នៅលើកោះរមណីយដ្ឋាន Jeju ភាគខាងត្បូង នាថ្ងៃចន្ទ (ទី៤ ខែវិច្ឆកា) នេះ ដើម្បីពិភាក្សាអំពីយុទ្ធសាស្ត្រ សម្រាប់កំណើនប្រកបដោយនិរន្តរភាព និងគម្រោងសំខាន់ៗដែលផ្តល់មូលនិធិខ្លះដោយកូរ៉េខាងត្បូង។

យោងតាមក្រសួងបានឲ្យដឹងថា វេទិកាដែលបានចាប់ផ្តើមនៅថ្ងៃនេះ ដោយមានរយៈពេល ៣ថ្ងៃ គឺដើម្បីពិនិត្យមើលគម្រោងសំខាន់ៗដែលត្រូវបានចាប់ផ្តើមដោយមូលនិធិ Korea Green Growth Trust Fund និងចែករំលែកបទពិសោធន៍ និងបច្ចេកវិទ្យារបស់ទីក្រុងសេអ៊ូល ទាក់ទងនឹងកំណើនបៃតងជាមួយប្រទេសកំពុងអភិវឌ្ឍន៍។

កិច្ចប្រជុំនេះបាននាំឲ្យមានការជួបជុំគ្នានូវមន្ត្រីប្រហែល ១៨០រូបមកពីរដ្ឋាភិបាលកូរ៉េខាងត្បូង និងក្រុមហ៊ុនធំៗ មន្ត្រីចំនួន ៨០នាក់មកពីធនាគារពិភពលោក និងមន្ត្រីចំនួន ១៣០នាក់ មកពីប្រទេសកំពុងអភិវឌ្ឍន៍ចំនួន ១៦ ដោយក្នុងនោះរួមមានទាំងអាហ្វ្រិកខាងត្បូង ម៉ុងហ្គោលី យេម៉ែន អ៊ូសបេគីស្ថាន និងកូឡុំប៊ីផងដែរ។

គួរបញ្ជាក់ថា ប្រទេសកូរ៉េខាងត្បូងបានផ្តល់ប្រាក់ចំនួន ២១០លានដុល្លារដល់មូលនិធិផ្ដល់ទំនុកចិត្តដែលត្រូវបានបង្កើតឡើងដោយធនាគារពិភពលោក ក្នុងឆ្នាំ២០១២ ហើយបច្ចុប្បន្នបានគាំទ្រគម្រោងចំនួន ២៣៧ផ្សេងទៀត នៅក្នុងប្រទេសចំនួន ៨៦ ជុំវិញពិភពលោក។ ហើយមន្ត្រីក្រសួង លោក Moon Ji-sung បានប្រាប់វេទិការថា៖ «កូរ៉េខាងត្បូងនឹងបន្តពង្រីកការរួមចំណែកដល់ប្រទេសដែលងាយរងគ្រោះដោយសារបម្រែបម្រួលអាកាសធាតុ»៕