ក្រុមអ្នកស្រុកនិយាយថា នៅថ្ងៃចន្ទនេះ ក្រុមអ្នកតាំងលំនៅនិគមន៍ជនជាតិជ្វីហ្វ បានដុតកម្ទេចរថយន្ត ២០គ្រឿង អំឡុងការវាយប្រហារលើទ្រព្យសម្បត្តិជនប៉ាឡេស្ទីននៅតំបន់ជាយក្រុង Ramallah អំឡុងការវាយឆ្មក់ដ៏គគ្លើនបំផុតរបស់ពួកគេនៅក្នុងតំបន់មួយនេះ ដែលបម្រើអាសនៈអាជ្ញាធរប៉ាឡេស្ទីននៅតំបន់កាន់កាប់វ៉េសប៊ែង ។

 ពួកគេនិយាយថា ជនវាយប្រហាររាប់សិបនាក់ ពាក់ម៉ាស់ និងកាន់គ្រាប់បែកសាំង មានគោលដៅវាយប្រហារលើតំបន់ Al-Bireh ស្ថិតនៅជាប់ទីក្រុង Ramallahនាវេលាម៉ោង ៣ព្រឹកទាបភ្លឺថ្ងៃចន្ទ ម៉ោងក្នុងស្រុក ដោយដុតកម្ទេចរថយន្តក្នុងរយៈពេលប៉ុន្មាននាទីប៉ុណ្ណោះ ។

 លោក Ihab al-Zaben គឺជាអ្នកស្រុកមួយរូប និយាយថា លោកបានស្រែកឲ្យក្រុមអ្នកតាំងលំនៅនិគមន៍ទាំងអស់នោះ ប៉ុន្តែពួកគេនៅតែបន្តដុតកម្ទេចរថយន្តចោល ដោយមិនខ្វល់ពីអ្វីទាំងអស់ ។

 លោកនិយាយថា ពេលដែលពួកយើងមកដល់ដើម្បីព្យាយាមពន្លត់ភ្លើង ពួកគេចាប់ផ្តើមបាញ់ប្រហារលើពួកយើង ។ ផ្នែកខាងមុខអគារអ្នកស្រុក រោលផ្សែងភ្លើងឡើងពណ៌ខ្មៅ ដោយសារអគ្គិភ័យឆាបឆេះរថយន្ត ដែលចតនៅក្រៅ ។

 អ្នកនាំពាក្យនគរបាលអ៊ីស្រាអែល និយាយនៅក្នុងសេចក្តីថ្លែងការណ៍ថា នគរបាលអ៊ីស្រាអែល និងទីភ្នាក់ងារសន្តិសុខ Shin Bet កំពុងបើកការស៊ើបអង្កេតលើករណីមួយនេះ ក្រោយពួកគេទទួលបានសេចក្តីរាយការណ៍ថា រថយន្តប៉ាឡេស្ទីនជាច្រើនគ្រឿង រងការដុតបំផ្លាញ ។

 អំពើហិង្សារបស់អ្នកតាំងលំនៅនិគមន៍ជនជាតិជ្វីហ្វលើសហគមន៍ប៉ាឡេស្ទីនក្នុងតំបន់វ៉េសប៊ែង បានធ្វើឲ្យមានការថ្កោលទោសជាអន្តរជាតិ ហើយនិងនាំឲ្យមានការដាក់ទណ្ឌកម្មលើក្រុមអ្នកតាំងលំនៅនិគមន៍ហិង្សាទាំងនេះ ដោយរដ្ឋាភិបាលជាច្រើន រួមទាំងសហរដ្ឋអាមេរិកផងដែរ ដែលជំរុញឲ្យអ៊ីស្រាអែល ចាត់វិធានការបន្ថែមទៀត ដើម្បីបញ្ឈប់ការវាយប្រហាររបស់ពួកគេ ៕