នៅថ្ងៃទី២០ ខែសីហា ឆ្នាំ ២០២៤ សារព័ត៌មាន Reuters បានរកឃើញករណីអំពើហិង្សាផ្នែកនយោបាយចំនួន ៣០០លើក ចាប់តាំងពីការវាយប្រហារកាលពីថ្ងៃទី៦ ខែមករា លើវិមានកាពីតូលក្នុងឆ្នាំ ២០២១ ដែលការរាប់នេះបន្តរហូតដល់ខែតុលាឆ្នាំនេះ។

ខណៈសារព័ត៌មាន Reuters បានចងក្រងចំនួននៃអំពើហិង្សានយោបាយរបស់ខ្លួនចាប់តាំងពីឆ្នាំ ២០២១ និងការពិគ្រោះយោបល់ជាមួយក្រុមអ្នកជំនាញ គេបានដឹងថានិន្នាការនៃអំពើហិង្សាដែលបានមើលឃើញក្នុងប៉ុន្មានឆ្នាំថ្មីៗនេះ គឺស្របគ្នានៃការកើនឡើងនៃអំពើហិង្សានយោបាយដែលបានចាប់ផ្តើមនៅប្រហែលឆ្នាំ ២០១៦។ នៅពេលអតីតប្រធានាធិបតី លោកDonald Trump ជាប់ឆ្នោតគ្រប់គ្រងអំណាចនៅសេតវិមាន។

 ការកើនឡើងនៃអំពើហិង្សានៅកម្រិតបច្ចុប្បន្ននេះ គឺជាចំនួន ឬតួលេខខ្ពស់បំផុត នៃអំពើហិង្សានយោបាយចាប់តាំងពីទសវត្សរ៍ឆ្នាំ ១៩៧០មក ។ 

ប៉ុន្មានខែចុងក្រោយនេះ ខណៈការបោះឆ្នោតចូលដល់នៅថ្ងៃអង្គារនេះ ត្រូវបានពណ៌ដោយព្រឹត្តិការណ៍កម្រិតខ្ពស់មួយចំនួននៃអំពើហិង្សាផ្នែកនយោបាយ។

គួរកត់សម្គាល់ថា កាលពីខែកក្កដាកន្លងទៅ មានការប៉ុនប៉ងធ្វើឃាតលើអតីតប្រធានាធិបតីលោក Trump នៅឯការជួបជុំមួយក្នុងទីក្រុង Butler រដ្ឋ Pennsylvania ដែលខ្មាន់កាំភ្លើងបានបាញ់ចំស្លឹកត្រចៀកខាងស្ដាំរបស់អតីតប្រធានាធិបតីនេះ ហើយអ្នកចូលរួមម្នាក់បានស្លាប់ និងអ្នកបាញ់ប្រហារក៏ត្រូវបានសម្លាប់ដោយកងកម្លាំងសន្តិសុខផងដែរ។

ក្រឡេកមើលអំពើហិង្សានយោបាយនៅសហរដ្ឋអាមេរិក និងការពិនិត្យមើលចំនួនកំណត់ត្រានៃការគំរាមកំហែងប្រឆាំងនឹងប្រភេទផ្សេងៗនៃមន្ត្រីសាធារណៈ និងការប្រើប្រាស់ភាសាហិង្សាដោយឥស្សរជនសាធារណៈមួយចំនួន គឺថា អំពើហិង្សានយោបាយ ឬការប្រើហិង្សាក្នុងភាសាជុំវិញនយោបាយបានក្លាយទៅជាធម្មតាទៅហើយ។ 

ទាំងអស់នេះហើយដែលធ្វើឲ្យក្រុមអ្នកជំនាញព្រួយបារម្ភថាក្រោយការបោះឆ្នោត ជាពិសេសមិនច្បាស់ថាអ្នកណាឈ្នះ ដែលអាចនាំឲ្យភាគីនយោបាយណាមួយប្រើអំពើហិង្សា ព្រោះគំនិតនៃអំពើហិង្សាដែលមានលក្ខណៈធម្មតានៅក្នុងវប្បធម៌របស់សហរដ្ឋអាមេរិក បានជ្រៀតចូលទៅក្នុងអាណាចក្រនយោបាយ៕