ការបោះឆ្នោតប្រធានាធិបតីអាណត្តិនេះដែលមិនដូចអ្វីផ្សេងទៀតនៅក្នុងប្រវត្តិសាស្រ្តសហរដ្ឋអាមេរិក បានឈានដល់ថ្ងៃចុងក្រោយកាលពីនៅថ្ងៃចន្ទ ៤ វិច្ឆិកា ខណៈបេក្ខជនមកពីគណបក្សសាធារណរដ្ឋលោក Donald Trump និងគូប្រជែងមកពីគណបក្សប្រជាធិបតេយ្យលោកស្រី Kamala Harris កំពុងប្រជែងគ្នាដើម្បីដណ្តើមជ័យជម្នះនៅក្នុងការប្រកួតប្រជែងដែលបង្ហាញពីពេលវេលាអត្ថិភាពសម្រាប់អាមេរិក។

មុនថ្ងៃបោះឆ្នោតនៅថ្ងៃអង្គារទី៥វិច្ឆិកា ប្រជាពលរដ្ឋដែលកំពុងទទទួលទានអាហារពេលល្ងាចនៅក្នុងសហគមន៍ West Allis ជិតទីក្រុង Milwaukee រដ្ឋ Wisconsin កំពុងអានកាសែតតាមដានព័ត៌មានអំពីការបោះឆ្នោតប្រធានាធិបតីដែលចូលមកដល់នៅថ្ងៃអង្គារនេះម៉ោងនៅអាមេរិក។

លោក Sal Jacobson អាយុ ៦៤ ឆ្នាំ ម្ចាស់អាជីវកម្មចូលនិវត្តន៍មកពីទីក្រុង Milwaukee និងអ្នកគាំទ្រគណបក្សសាធារណរដ្ឋដែលបានបោះឆ្នោតឱ្យអតីតប្រធានាធិបតីលោក Trump បាននិយាយថារូបលោកមិនអាចទ្រាំរង់ចាំដល់ថ្ងៃបោះឆ្នោតនោះទេ។ លោកធុញទ្រាន់នឹងការផ្សព្វផ្សាយនិងនយោបាយដ៏ច្របូកច្របល់។ 

ចំណែកប្រជាពលរដ្ឋម្នាក់ទៀតគឺ លោក Mike Weber អាយុ៦៣ ឆ្នាំ ជាមន្ត្រីពន្លត់អគ្គិភ័យមួយរូប កំពុងអង្គុយផឹកកាហ្វេ និងរង់ចាំអាហារ ក៏បានមើលឃើញការផ្សព្វផ្សាយព័ត៌មានការបោះឆ្នោដ៏លើសលប់ផងដែរ ប៉ុន្តែបាននិយាយថាលោកមិនសូវយកចិត្តទុកដាក់ការជ្រើសរើសមេដឹកនាំថ្មីប៉ុន្មានទេ ដោយនិយាយថាទោះបីជាអ្នកណាឈ្នះក៏នឹងមានភាពវឹកវរ និងភាពមិនច្បាស់លាស់ដូចគ្នាដដែល។រីឯពលរដ្ឋម្នាក់ទៀតគឺលោក Jerry Ulrich អាយុ ៧៥ ឆ្នាំ ជាម្ចាស់អាជីវកម្មដែលមិនចង់ប្រាប់ថាលោកនឹងបោះឆ្នោតឱ្យអ្នកណានោះ បាននិយាយថាលោកព្រួយបារម្ភអំពីអ្វីដែលអាចកើតឡើងនៅថ្ងៃបោះឆ្នោត លោកគិតថា ទោះអ្នកណាឈ្នះក៏ដោយ ក៏នឹងមានភាពវឹកវរ និងភាពមិនច្បាស់លាស់ដូចគ្នាដដែល៕