នាង Salwa Abdallah បានគ្រាន់បើពីការព្យាបាលផ្នែកវះកាត់ដើម្បីសម្រាលកូន នៅពេលនោះទាហានជាច្រើននាក់ បានចូលទៅលំនៅឋានរបស់នាង។ ពួកគេមកពីកងកម្លាំងគាំទ្ររហ័ស ជាភាគីម្ខាងនៅក្នុងសង្រ្គាមរយៈពេល១៩ ខែនៅក្នុងប្រទេសស៊ូដង់។ ពួកគេបានចោទប្រកាន់នាងថា បានគាំទ្រគូប្រជែង គឺកងទ័ពស៊ូដង់និងសម្ព័ន្ធមិត្ត ហើយបានគំរាមសម្លាប់នាង កូន និងម្តាយរបស់នាង។

យោងតាមក្រុមសកម្មជនបានឲ្យដឹងថា រដ្ឋភាគខាងកើត បានទទួលរងការវាយឆ្មក់ និងហិង្សាយ៉ាងខ្លាំង ជាបន្តបន្ទាប់ ក្នុងរយៈពេលពីរសប្តាហ៍កន្លងទៅនេះ។

អង្គការសហប្រជាជាតិនិយាយថាមនុស្ស ១៣៥.០០០នាក់ បានភៀសខ្លួនចេញពីលំនៅឋានដោយសារតែការផ្ទុះឡើងអំពើហិង្សាថ្មីៗនេះ។

ទីក្រុង El Gezira បានទទួលរងនូវយុទ្ធនាការលួចប្លន់ដ៏ហិង្សាដោយកងកម្លាំងគាំទ្ររហ័ស(RSF) ចាប់តាំងពីក្រុមនេះ បានចូលគ្រប់គ្រង កាលពីខែធ្នូ ឆ្នាំមុន។

ឧប្បត្តិហេតុដ៏អាក្រក់បំផុតគឺនៅក្រុង al-Sireha ជាកន្លែងដែលគណៈកម្មាធិការមួយ បាននិយាយថាមនុស្ស១២៤ នាក់ត្រូវបានសម្លាប់ កាលពីថ្ងៃទី២៥ ខែតុលា។

វីដេអូដែលត្រូវបានផ្ទៀងផ្ទាត់ដោយសារព័ត៌មាន Reuters បានបង្ហាញទាហានរបស់កងកម្លាំងគាំទ្ររហ័ស(RSF) តម្រង់ជួរក្រុមបុរស។ ពួកគេភាគច្រើនជាមនុស្សចាស់ ហើយមួយចំនួនស្ថិតក្នុងសម្លៀកបំពាក់ប្រឡាក់ឈាម។