សម្ព័ន្ធមិត្តអ៊ឺរ៉ុប របស់សហរដ្ឋអាមេរិក កំពុងត្រៀមខ្លួនទប់ទល់នឹងមេដឹកនាំអាមេរិកថ្មីដែលមិនសូវចាប់អារម្មណ៍លើពួកគេ មិនថាអ្នកណាឈ្នះការបោះឆ្នោតប្រធានាធិបតីនោះទេ ហើយក៏ត្រៀមព្យាបាលរបួសចាស់ និងទប់ទល់បញ្ហាថ្មីផងដែរ ប្រសិនបើលោក Donald Trump ត្រឡប់ទៅកាន់សេតវិមានវិញ។

ការបោះឆ្នោតនេះ កើតឡើងក្នុងអំឡុងសង្រ្គាមដ៏តានតឹងរវាងរុស្ស៊ី និងអ៊ុយក្រែន ដែលក្នុងនោះទីក្រុងវ៉ាស៊ីនតោន បានរួមចំណែកដ៏ធំបំផុតតែមួយគត់ចំពោះការការពាររបស់ទីក្រុងគីវ។ មានសំណួរចោទឡើងជាច្រើនថា តើការគាំទ្រនោះនឹងបន្តនៅក្រោមការដឹកនាំរបស់លោក Trump ឬទេ ហើយតើលោកនឹងប្តេជ្ញាចិត្តយ៉ាងណាចំពោះសម្ព័ន្ធមិត្តណាតូ។

ជ័យជម្នះរបស់អនុប្រធានាធិបតី Kamala Harris អាចត្រូវបានគេរំពឹងថានឹងនាំមកនូវការបន្តនៃគោលនយោបាយបច្ចុប្បន្ន ទោះបីជាមានការប្រឆាំងពីគណបក្សសាធារណរដ្ឋ និងការកើនឡើងនូវភាពនឿយហត់ក្នុងសង្គ្រាមក្នុងចំណោមសាធារណជនអាមេរិកក៏ដោយ។

ប៉ុន្តែលទ្ធភាពនៃតំណែងប្រធានាធិបតីលោក Trump លើកពីរ ពុំមែនជាកង្វល់តែមួយគត់នោះទេ ខណៈទ្វីបដ៏ចំណាស់នេះព្រួយបារម្ភពីពេលវេលាដ៏តឹងតែងនៅខាងមុខ។ មន្ត្រីអឺរ៉ុបជឿថា អាទិភាពរបស់អាមេរិកស្ថិតនៅកន្លែងផ្សេង មិនថាអ្នកណាឈ្នះនោះទេ។ មជ្ឈិមបូព៌ា គឺជាចំណុចសំខាន់នៃបញ្ជីរបស់លោកប្រធានាធិបតី Joe Biden ឥឡូវនេះ ប៉ុន្តែអាទិភាពរយៈពេលវែងគឺប្រទេសចិន ដែលនេះបង្ហាញពីសញ្ញាមិនអើពើនឹងប្លុកអឺរ៉ុប៕