អ្នកតាំងលំនៅអ៊ីស្រាអែល បានដុតបំផ្លាញរថយន្តជិត ២០គ្រឿង កាលពីព្រឹកថ្ងៃចន្ទ នៅទីក្រុង Al-Bireh នៃតំបន់វេសបែងដែលគ្រប់គ្រងដោយអ៊ីស្រាអែល នៅជិតទីក្រុងរ៉ាម៉ាឡា (Ramallah)។ នេះបើយោងតាមអង្គភាពការពារស៊ីវិលប៉ាឡេស្ទីន និងប្រភពសន្តិសុខអ៊ីស្រាអែល។

អ្នកសារព័ត៌មាន AFP ម្នាក់ បានឃើញរថយន្តជាច្រើន បានឆាបឆេះទាំងស្រុង ហើយផ្នែកខាងមុខនៃអគារ ៥ជាន់ ដែលពួកវា ត្រូវបានចតខាងក្រៅនោះ បានឆេះរូលឡើងខ្មៅ។

លោក រ៉ាមី អូម៉ា (Rami Omar) ប្រធានការិយាល័យការពារជនស៊ីវិល នៅក្នុងតំបន់ បាននិយាយថា ការជូនដំណឹងមួយ បានកើតឡើង «នៅម៉ោង៣:៣០ព្រឹក (០១:៣០ម៉ោងសកល) ជាសញ្ញាថា អ្នកតាំងលំនៅ បានចូលទៅក្នុងតំបន់នោះ ហើយបានធ្វើសកម្មភាពបំផ្លិចបំផ្លាញ»។

មន្ត្រីសន្តិសុខអ៊ីស្រាអែលបានប្រាប់ AFP ពីការជូនដំណឹងអំពីឧបទ្ទវហេតុនេះ បានកើតឡើង នៅម៉ោង៤:០០ ព្រឹក ហើយទាហាន ត្រូវបានបញ្ជូនដែលមកដល់កន្លែងកើតហេតុ បន្ទាប់ពីអ្នកតាំងលំនៅទាំងនោះ បានចាកចេញ។

មន្ត្រីដែលមិនត្រូវបានអនុញ្ញាតឲ្យនិយាយជាសាធារណៈអំពីបញ្ហានេះ បានអះអាងថា រថយន្តចំនួន ១៩ គ្រឿង ត្រូវបានដុតបំផ្លាញ ដោយក្រុមអ្នកតាំងលំនៅ។

មន្ត្រីរូបនេះ បានបន្ថែមថា នគរបាល ទាហាន និងមន្ត្រីទីភ្នាក់ងារសន្តិសុខ Shin Bet អ៊ីស្រាអែល បានប្រមូលភ័ស្តុតាងនៅទីក្រុង Al-Bireh ដើម្បីស៊ើបអង្កេត។

អាជ្ញាធរអ៊ីស្រាអែល នៅមិនទាន់ដឹងថា អ្នកតាំងទីលំនៅនោះ មកពីណាកន្លែងណា និងមានហេតុផល អ្វីនោះទេ។