​

ក្រុមមន្ត្រី បាននិយាយនៅថ្ងៃអង្គារនេះថា ប្រទេសហ្វីលីពីន បានបញ្ជាឱ្យមានការជម្លៀសពលរដ្ឋ ស្តុកទុកស្បៀងអាហារ និងបានដាក់ទាហានឱ្យប្រចាំការ ដើម្បីត្រៀមទប់ទល់ព្យុះទីហ្វុង Yinxing ខណៈ ព្យុះនេះ បានវាយបោកបក់ឆ្ពោះទៅទីក្រុងនានានៅភាគឦសាន ជាកន្លែងដែលព្យុះអាចបោកបក់ដល់ដីគោកនៅក្នុងសប្តាហ៍នេះ។

ទីភ្នាក់ងារអាកាសធាតុរដ្ឋ បាននិយាយថា ព្យុះទីហ្វុងនាំមកកម្លាំងខ្យល់បក់១២០គីឡូម៉ែត្រក្នុងមួយម៉ោង ត្រូវបានគេប៉ាន់ស្មានថាស្ថិតក្នុងចម្ងាយ៥៩០គីឡូម៉ែត្រពីទីក្រុង Baler ភាគខាងកើតខេត្ត Aurora ។

រដ្ឋមន្ត្រីក្រសួងការពារជាតិ លោក Gilberto Teodoro បាននិយាយថា ក្រសួងរដ្ឋាភិបាលក្នុងតំបន់ បានអំពាវនាវដល់អ្នកទាំងឡាយនៅក្នុងសហគមន៍ដាច់ស្រយាលត្រូវជម្លៀសចេញជាមុន ខណៈក្រុមអ្នកជួយសង្គ្រោះ បង្ហាញថា ពុំអាចចូលទៅដល់ពលរដ្ឋក្នុងអំឡុងពេលព្យុះវាយបោកបក់ខ្លាំង។

លោក Teodoro និយាយក្នុងសន្និសីទសារព័ត៌មានថា ទីភ្នាក់ងាររដ្ឋាភិបាលនានា បានរួមសហការគ្នាក្នុងការចេញការព្រមានជាមុន រៀបចំផែនការជាមុន និងកំណត់ទីតាំងឲ្យបានមុនសម្រាប់ជំនួយ និងសេវាកម្មដែលត្រូវការចាំបាច់។ មន្ត្រីនិយាយថា ស្បៀងអាហារកំពុងត្រូវបានស្តុកទុក ហើយទាហានកំពុងត្រូវបានដាក់ឲ្យប្រចាំការដើម្បីជួយក្នុងកិច្ចខិតខំប្រឹងប្រែងសង្គ្រោះ ខណៈទំនប់ទឹក កំពុងបញ្ចេញទឹកនៅមុនពេលកំណត់ ដើម្បីការពារទឹកជំនន់។

មន្ត្រីទីភ្នាក់ងារអាកាសធាតុ និយាយថា ព្យុះនេះអាចបោកបក់នៅដីគោកនៅចន្លោះល្ងាចថ្ងៃព្រហស្បតិ៍ និងព្រឹកថ្ងៃសុក្រ នៅជុំវិញខេត្ត Cagayan ភាគខាងជើង ដោយនាំមកនូវភ្លៀងធ្លាក់ខ្លាំង នៅទីប្រជុំជននានា ក្នុងផ្លូវរបស់ព្យុះ។

អ្នកគ្រប់គ្រងការពារជនស៊ីវិល លោក Ariel Nepomuceno បាននិយាយថា មនុស្សប្រហែល២៤ លាននាក់ អាចរងផលប៉ះពាល់ដោយផ្ទាល់ដោយសារព្យុះទីហ្វុង។

តួរលេខការពារជនស៊ីវិលបង្ហាញថា ព្យុះនេះជាព្យុះទីបីក្នុងរយៈពេលមិនដល់មួយខែ ដែលគំរាមកំហែងដល់ប្រទេសហ្វីលីពីន បន្ទាប់ពីព្យុះ Trami និងព្យុះទីហ្វុងកង្រី(Kong-rey) ដែលបានវាយបោកបក់នៅលើកោះ Luzon ក្នុងប៉ុន្មានសប្តាហ៍ថ្មីៗនេះ បណ្តាលឲ្យមនុស្ស១៥១នាក់ស្លាប់ និង២១ នាក់បាត់ខ្លួន។