សារព័ត៌មាន Jerusalem Post បានរាយការណ៍ដោយដកស្រង់ប្រភពពីប្រភពនានាថា កងកម្លាំងការពារអ៊ីស្រាអែល បានបង្កើនកម្រិតនៃការត្រៀមខ្លួន ដើម្បីទប់ទល់នឹងការសងសឹកដ៏មានសក្តានុពលរបស់អ៊ីរ៉ង់ ចំពោះការវាយប្រហារចុងក្រោយរបស់អ៊ីស្រាអែល។

របាយការណ៍បាននិយាយថា ជាផ្នែកមួយនៃការប្រុងប្រយ័ត្នខ្ពស់ អគ្គសេនាធិការរបស់កងកម្លាំងការពារអ៊ីស្រាអែល (IDF) ធ្វើការវាយតម្លៃស្ថានភាពប្រចាំថ្ងៃនៅគ្រប់ផ្នែករបស់ខ្លួន។

ប្រភពមួយ បាននិយាយថា៖«ទោះបីជាមានរបាយការណ៍ផ្សេងៗនៅក្នុងប្រព័ន្ធផ្សព្វផ្សាយបរទេសក៏ដោយ ក៏ពុំមានព័ត៌មានបញ្ជាក់អំពីពេលវេលាពិតប្រាកដនៃការឆ្លើយតបនោះទេ»។

សារព័ត៌មាននេះ បានរាយការណ៍ថា IDF មិនបានច្រានចោលលទ្ធភាពនៃការឆ្លើយតបរបស់អ៊ីរ៉ង់ពីស៊ីរី យេម៉ែន ឬអ៊ីរ៉ាក់ ជាជាងដោយផ្ទាល់ពីអ៊ីរ៉ង់នោះទេ។

កាលពីថ្ងៃទី ២៦ ខែតុលា កងកម្លាំងការពារអ៊ីស្រាអែល បាននិយាយថា ខ្លួនបានវាយប្រហារទីតាំងយោធានៅខាងក្នុងអ៊ីរ៉ង់ ជាការឆ្លើយតបទៅនឹង«ការវាយប្រហារជាបន្តបន្ទាប់»។ កងកម្លាំងការពារដែនអាកាសរបស់អ៊ីរ៉ង់ បាននិយាយនៅក្នុងសេចក្តីថ្លែងការណ៍មួយថា ទីតាំងយោធានៅក្នុងខេត្ត Ilam, Tehran និង Khuzestan ត្រូវបានវាយប្រហារ ប៉ុន្តែបានទទួលរងការខូចខាតមានកម្រិត។ យ៉ាងហោចណាស់ទាហានអ៊ីរ៉ង់៤នាក់ និងជនស៊ីវិលម្នាក់ បានស្លាប់នៅក្នុងការវាយប្រហាររបស់អ៊ីស្រាអែល។