មន្ត្រីសន្តិសុខលោកខាងលិច បានប្រាប់ប្រព័ន្ធផ្សព្វផ្សាយ NBC News ថា ប្រទេសរុស្ស៊ីត្រូវទទួលខុសត្រូវ ចំពោះការបញ្ជូនឧបករណ៍បង្កជាការផ្ទុះចំនួន ២កញ្ចប់ ទៅកាន់មជ្ឈមណ្ឌលដឹកជញ្ជូន DHL នៅប្រទេសអាល្លឺម៉ង់ និងចក្រភពអង់គ្លេស កាលពីខែកក្កដា ដោយនេះជាផ្នែកមួយនៃយុទ្ធនាការវិឆ្ឆេទកម្មដ៏ធំទូលំទូលាយ ដែលអាចនឹងចាប់ផ្តើមវាយប្រហារលើយន្តហោះធ្វើដំណើរឆ្ពោះទៅនឹងអាមេរិកខាងជើង។

សារព័ត៌មាន Wall Street Journal បានរាយការណ៍ដំបូងគេ អំពីគ្រោងការដ៏គួរឲ្យសង្ស័យនេះ។ យោងតាមមន្ត្រីរដ្ឋាភិបាល និងប្រព័ន្ធផ្សព្វផ្សាយប៉ូឡូញ បានឲ្យដឹងថា អាជ្ញាធរប៉ូឡូញ បានចាប់ខ្លួនមនុស្ស ៤នាក់ ហើយនិងកំពុងស្វែងរកមនុស្ស ២នាក់ផ្សេងទៀត ពាក់ព័ន្ធនឹងករណីនេះ។

នៅក្នុងអ៊ីម៉ែល (សារអេឡិចត្រូនិក) របស់ខ្លួន DHL បានឲ្យដឹងថា ខ្លួនដឹងអំពីហេតុការណ៍ផ្ទុះចំនួន ២ដង ថ្មីៗនេះ ដែលពាក់ព័ន្ធនឹងការដឹកជញ្ជូននៅក្នុងបណ្តាញរបស់ក្រុមហ៊ុន ហើយថា ខ្លួនកំពុងសហការជាមួយអ្នកស៊ើបអង្កេត។

ចំណែករដ្ឋបាលសន្តិសុខដឹកជញ្ជូនរបស់សហរដ្ឋអាមេរិក បាននិយាយថា ខ្លួនបានពង្រឹងការត្រួតពិនិត្យទំនិញតាមអាកាស ក្នុងរយៈពេលជាច្រើនខែកន្លងមកនេះ។

អាជ្ញាធរអាល្លឺម៉ង់ និងអង់គ្លេស បានប្រាប់ឲ្យដឹងថា ពួកគេកំពុងស៊ើបអង្កេត ជុំវិញការសង្ស័យពីការធ្វើអំពើវិឆ្ឆិទកម្មរុស្ស៊ី ក្នុងឧប្បត្តិហេតុចំនួន២ កាលពីខែកក្កដា។ កញ្ចប់មួយដែលកំពុងនៅលើផ្លូវទៅកាន់យន្តហោះ បានផ្ទុះនៅមជ្ឈមណ្ឌលដឹកជញ្ជូន DHL ក្នុងទីក្រុង Leipzig របស់អាល្លឺម៉ង់ មុនពេលមានការហោះហើរដែលបានគ្រោងទុក។ ហើយក្នុងខែកក្កដានោះផងដែរ កញ្ចប់មួយទៀតបានផ្ទុះឆេះ នៅមជ្ឈមណ្ឌល DHL ក្នុងទីក្រុង Birmingham របស់អង់គ្លេស។

មន្ត្រីលោកខាងលិចបាននិយាយថា កញ្ចប់ទាំងនោះ រួមមានម៉ាស៊ីនម៉ាស្សាអគ្គិសនីដែលងាយឆេះដោយសារសារធាតុម៉ាញេស្យូម៕