មេដឹកនាំជាន់ខ្ពស់ក្រុមហាម៉ាស បានប្រកាសកាលពីថ្ងៃចន្ទថា ចលនានេះ បានធ្វើការពិភាក្សាជាមួយចលនារំដោះជាតិប៉ាឡេស្ទីន Fatah អំពីការបង្កើតគណៈកម្មាធិការមួយ ដើម្បីដោះស្រាយបញ្ហាដែលទាក់ទងនឹងតំបន់ហ្កាហ្សា។ 

លោក Osama Hamdan មេដឹកនាំក្រុមហាម៉ាស បាននិយាយនៅក្នុងសុន្ទរកថាតាមទូរទស្សន៍ថា៖      «បន្ទាប់ពីកិច្ចប្រជុំរវាងថ្នាក់ដឹកនាំចលនារបស់យើង និងក្រុមប្រឆាំងប៉ាឡេស្ទីនផ្សេងៗ យើងបានជួបជាមួយបងប្អូនរបស់យើងនៅក្នុងចលនា Fatah ដែលត្រូវបានអញ្ជើញដោយប្រទេសអេហ្ស៊ីប»។

លោកបានបន្ថែមថា ថ្នាក់ដឹកនាំទាំងពីរ បានពិភាក្សាអំពីបញ្ហាសំខាន់ៗ ដោយផ្តោតលើសង្គ្រាមនៅតំបន់ហ្កាហ្សា និងតម្រូវការសម្រាប់សកម្មភាពជាតិបង្រួបបង្រួម ដោយផ្អែកលើការឯកភាពរបស់ប៉ាឡេស្ទីន ដោយបដិសេធរាល់ការរៀបចំដោយការបង្ខិតបង្ខំ។

លោកបានសង្កត់ធ្ងន់ថា ការគ្រប់គ្រងកិច្ចការរបស់ប៉ាឡេស្ទីន មិនថា នៅតំបន់ហ្កាហ្សា តំបន់វេសបែង ឬជនភៀសខ្លួន គឺជាបញ្ហាដែលត្រូវកំណត់ដោយកិច្ចព្រមព្រៀងជាតិតែមួយគត់។

លោកបានបន្ថែមថាកិច្ចប្រជុំជាមួយ Fatah បានពិភាក្សាអំពីគំនិតដូចជាការបង្កើតគណៈកម្មាធិការមួយដើម្បីដោះស្រាយតម្រូវការ និងកិច្ចការនៅតំបន់ហ្កាហ្សា រហូតដល់លក្ខខណ្ឌអនុញ្ញាតឲ្យមានរដ្ឋាភិបាលឯកភាពជាតិមួយ។