នាយករដ្ឋមន្ត្រីអៀរឡង់ លោក Simon Harris នៅថ្ងៃអង្គារ (ទី៥ ខែវិច្ឆិកា) នេះ បាននិយាយថា លោកគ្រោងនឹងប្រកាសពីការបោះឆ្នោតសភា នៅចុងសប្តាហ៍នេះ ដែលទំនងជានឹងកំណត់កាលបរិច្ឆេទការបោះឆ្នោត នៅចុងខែនេះ។

លោក Harris មានពេលរហូតដល់ខែមីនា ទើបដល់ការបោះឆ្នោត ប៉ុន្តែបាន និងកំពុងរៀបចំការបោះឆ្នោតមុនកំណត់នេះ ដោយសារការផ្ដល់ថវិកាចំនួន ១០,៥ពាន់លានអឺរ៉ូ កាលពីខែមុន ដោយមានអ្នកបោះឆ្នោតជាច្រើនចាប់ផ្តើមទទួលបានអត្ថប្រយោជន៍ពីកញ្ចប់ថវិកានេះ ក្នុងសប្តាហ៍នេះ។

លោក Harris បានប្រាប់អ្នកសារព័ត៌មានថា៖ «ខ្ញុំមានបំណងស្វែងរកការរំលាយ Dail (សភា) នៅសប្តាហ៍នេះ ខ្ញុំមិនគិតថា វានឹងកើតឡើង ហើយផ្ដល់ការភ្ញាក់ផ្អើលដល់នរណាម្នាក់នៅទូទាំងប្រទេសនេះទេ»។

ដោយសំដៅលើច្បាប់ដែលរដ្ឋាភិបាលមានគោលបំណងឲ្យទទួលបានការអនុម័តពីសភា នៅថ្ងៃព្រហស្បតិ៍មុនពេលលោក Harris ដាក់ចេញកាលបរិច្ឆេទបោះឆ្នោត ដែលរំពឹងថា នឹងនៅថ្ងៃទី២៩ ខែវិច្ឆិកានោះ លោកបានបន្ថែមថា៖ «យើងត្រូវការធ្វើឲ្យសម្រេចកិច្ចការនេះ នៅ ២-៣ថ្ងៃខាងមុខជាមុនសិន»។

គួរបញ្ជាក់ថា បើតាមការស្ទង់មតិមតិកាលពីថ្ងៃអាទិត្យចុងសប្ដាហ៍កន្លងមក បានបង្ហាញថា គណបក្ស Fine Gael របស់លោក Harris ទទួលបានសំឡេងគាំទ្រ ២៦ភាគរយ ដៃគូរដ្ឋាភិបាលចម្រុះដ៏សំខាន់របស់ខ្លួន និងជាក្រុមកណ្តាលស្តាំនិយម គឺគណបក្ស Fianna Fail មាន ២០ភាគរយ ហើយគណបក្សប្រឆាំងដ៏ធំ Sinn Fein តាមពីក្រោយ មានសំឡេងគាំទ្រ ១៨ភាគរយ៕