ទីភ្នាក់ងារព័ត៌មានផ្លូវការប៉ាឡេស្ទីន WAFA និងសារព័ត៌មានក្រុមហាម៉ាស់ រាយការណ៍ថា ការវាយប្រហារតាមច្រកអាកាសបណ្តាលឲ្យខូចខាតផ្ទះ ២ខ្នងនៅទីក្រុង Beit Lahiya ស្ថិតនៅភាគខាងជើងតំបន់ហ្កាហ្សា ជាកន្លែងដែលកងទ័ពអ៊ីស្រាអែល បើកការវាយប្រហារថ្មីចាប់តាំងពីថ្ងៃទី ៥ ខែតុលារហូតមក និងបានសម្លាប់ជនប៉ាឡេស្ទីនយ៉ាងហោច ២០នាក់ កាលពីយប់ថ្ងៃចន្ទ ។

នៅថ្ងៃអង្គារនេះដែរ យន្តហោះអ៊ីស្រាអែល បានទម្លាក់ខិត្តប័ណ្ណលើទីក្រុង Beit Lahiya បញ្ជាឲ្យអ្នកស្រុកដែលមិនទាន់ចាកចេញពីផ្ទះសម្បែងរបស់ពួកគេ និងជំរំជ្រកកោនទទួលគ្រួសារជម្លៀសខ្លួន ឲ្យចាកចេញពីទីក្រុងមួយនេះជាបន្ទាន់ ។

ជនប៉ាឡេស្ទីន និយាយថា ការវាយប្រហារថ្មី និងការបញ្ជារបស់អ៊ីស្រាអែលឲ្យមនុស្សជម្លៀសខ្លួន មានគោលដៅមួយគត់ គឺធ្វើឲ្យទីក្រុង ២នៅភាគខាងជើងហ្កាហ្សា ក្លាយជាតំបន់គ្មានមនុស្សរស់នៅ និងដណ្តើមយកជំរំជនភៀសខ្លួនធ្វើជាតំបន់ទ្រនាប់សម្រាប់ពួកគេ ។

អ៊ីស្រាអែលនិយាយថា ការបញ្ជាឲ្យជម្លៀសខ្លួននេះ មានន័យចង់ធ្វើឲ្យជនស៊ីវិលគេចផុតពីការប៉ះពាល់ ពេលដែលទាហានរបស់ពួកគេប្រយុទ្ធជាមួយក្រុមហាម៉ាស់ ។

យោធាអ៊ីស្រាអែល និយាយថា ក្រុមប្រដាប់អាវុធប៉ាឡេស្ទីនរាប់រយនាក់ ត្រូវបានសម្លាប់ ឬចាប់ខ្លួននៅតំបន់ Jabalia ក្នុងរយៈពេល ១ខែកន្លងមកនេះ ។

ក្រុមអាជ្ញាធរនៅតំបន់ហ្កាហ្សា និយាយថា ជនប៉ាឡេស្ទីនជាង ៤៣.៣០០នាក់ ត្រូវបានសម្លាប់នៅក្នុងសង្រ្គាមរយៈពេលជាង ១ឆ្នាំមកនេះនៅតំបន់ហ្កាហ្សា ហើយតំបន់ភាគច្រើននៃដែនដីមួយនេះ បានក្លាយជាគំនរបាក់បែក ៕