រដ្ឋអាជ្ញា នៅថ្ងៃអង្គារ (ទី៥ ខែតុលា) នេះ បាននិយាយថា នគរបាលអាល្លឺម៉ង់ បានចាប់ខ្លួនមនុស្សចំនួន ៨នាក់ ដោយសង្ស័យថា ជាសមាជិកនៃក្រុមសកម្មប្រយុទ្ធស្តាំនិយម ដែលត្រូវបានជំរុញដោយមនោគមវិជ្ជាប្រកាន់ពូជសាសន៍ និងទ្រឹស្តីរួមគំនិតធ្វើអំពើទុច្ចរិត ដែលបានហ្វឹកហាត់ធ្វើសង្រ្គាម ដើម្បីផ្ដួលរលំរដ្ឋអាល្លឺម៉ង់សម័យទំនើបនេះ។

ព័ត៌មាននៃការចាប់ខ្លួននេះបានកើតឡើងនៅពេលដែលប្រតិបត្តិការរបស់នគរបាល ដែលមានកម្លាំង ៤៥០រូប កំពុងដំណើរការទៅ ដើម្បីរុះរើក្រុមដែលដាក់ឈ្មោះដោយរដ្ឋអាជ្ញាថា «Saechsische Separatisten» ឬ «Saxony Separatists» (ក្រុមបំបែកខ្លួន Saxony)។

រដ្ឋមន្ត្រីក្រសួងមហាផ្ទៃ លោកស្រី Nancy Faeser បានឲ្យដឹងនៅក្នុងសេចក្តីថ្លែងការណ៍ថា៖ «ជាលទ្ធផល អាជ្ញាធរសន្តិសុខរបស់យើង បានរារាំងដល់ផែនការធ្វើរដ្ឋប្រហារដំណាក់កាលដំបូងដោយពួកភេរវករស្តាំនិយម ដែលកំពុងរៀបចំគម្រោងការ Day X ដើម្បីវាយប្រហារប្រជាជន និងរដ្ឋរបស់យើងដោយកម្លាំងប្រដាប់អាវុធ»។

គួរបញ្ជាក់ថា នេះនឹងជាគម្រោងរដ្ឋប្រហារលើកទី២ ដែលត្រូវបានរកឃើញ នៅអាល្លឺម៉ង់ ក្នុងរយៈពេលប៉ុន្មានឆ្នាំចុងក្រោយនេះ៕