មន្រ្តីមួយរូបរបស់អង្គការសុខភាពពិភពលោក(WHO) បាននិយាយនៅថ្ងៃអង្គារនេះថា អ្នកជំងឺជាង ១០០នាក់ រួមទាំងកុមារផងដែរនោះ ដែលរងរបួស និងមានជំងឺរ៉ាំរ៉ៃ នឹងត្រូវជម្លៀសចេញពីតំបន់ហ្កាហ្សានៅថ្ងៃពុធស្អែកនេះ ដែលជាការបញ្ជូនដ៏កម្រមួយចេញពីដែនដីបិទច្រកញាំញីដោយសារសង្រ្គាមមួយនេះ ។

លោក Rik Peeperkorn គឺជាអ្នកតំណាង WHOសម្រាប់ដែនដីកាន់កាប់ប៉ាឡេស្ទីន បាននិយាយថា មាននូវវិធានការពិសេស ។ អ្វីដែលពួកយើងស្នើសុំម្តងហើយម្តងទៀត គឺការជម្លៀសផ្នែកវេជ្ជសាស្រ្តទៅក្រៅតំបន់ហ្កាហ្សា ។ លោកថា មនុស្ស ១២.០០០នាក់ រង់ចាំការបញ្ជូនចេញ ។

លោកបន្តថា អ្នកជំងឺនឹងត្រូវធ្វើដំណើរតាមក្បួនរថយន្តទ្រង់ទ្រាយធំ កាត់តាមច្រកព្រំដែន Kerem Shalom ជាមួយអ៊ីស្រាអែល មុនពេលដឹកតាមជើងហោះហើរទៅកាន់ប្រទេសអារ៉ាប់រួម ហើយអ្នកជំងឺមួយផ្នែកទៀត នឹងធ្វើដំណើរទៅកាន់ប្រទេសរ៉ូម៉ានី ។

លោក Peeperkorn និយាយទៀតថា ពួកយើងមិនអាចបន្តផ្លូវដែលពួកយើងធ្វើបច្ចុប្បន្នបាននោះទេ ។ ពួកយើងត្រូវការច្រករបៀងវេជ្ជសាស្រ្ត គឺជាច្រករបៀវវេជ្ជសាស្រ្តដំបូងគេដែលពួកយើងបានស្នើសុំម្តងហើយម្តងទៀត ដើម្បីស្តាឡើងវិញផ្លូវចេញពីតំបន់ហ្កាហ្សា ទៅកាន់តំបន់ហ្សេរុយសាឡឹមខាងកើត និងតំបន់វ៉េសប៊ែង ៕