​ហៃទី៖ យោង​តាម​អង្គការ Christian Aid Ministries ក្រុម​សាសនទូត ឬ​អ្នក​ផ្សព្វផ្សាយ​សាសនា​ចំនួន ១៧នាក់​មកពី​សហរដ្ឋអាមេរិក ​និង​កាណាដា​ ដែល​ខ្លះ​ជា​អនីតិជន​ត្រូវ​បាន​ចាប់ជំរិត​នៅ​ប្រទេស​ហៃ​ទី​កាលពី​ថ្ងៃ​សៅរ៍។ ​សេចក្ដីថ្លែងការណ៍​មួយ​ដែល​ចេញផ្សាយ​ដោយ​អង្គការ​ដែល​មាន​មូលដ្ឋាន​នៅ​រដ្ឋ Ohio សហរដ្ឋ​អាមេរិក​កាលពី​ថ្ងៃអាទិត្យ​បាន​និយាយ​ថា ​ក្រុម​ពលរដ្ឋ​អាមេរិក​ចំនួន ១៦​នាក់​ និង​ពលរដ្ឋ​កាណាដា​ម្នាក់​រួមមាន​បុរស ៥​នាក់​ស្ត្រី ៧​នាក់​ និង​កុមារ ៥​នាក់​។

ពួកគេ​បាន​និយាយ​ថា យើង​កំពុង​ស្វែងរក​ការ​ណែនាំ​ពី​ព្រះ​ជា​ម្ចាស់​ដើម្បី​រក​ដំណោះស្រាយ ហើយ​ក្រុម​អាជ្ញាធរ​កំពុង​ស្វែងរក​វិធី​ដើម្បី​ជួយ​សង្គ្រោះ​ពួកគេ។​ ​យោង​តាម​ប្រភព​មួយ​នៅ​ក្នុង​កងកម្លាំង​សន្តិសុខ​របស់​ហៃ​ទីដែល​បាន​សន្មត​ថា ​ការ​ចាប់​ជំរិត​នេះ​គឺជា​ស្នាដៃ​របស់​ក្រុម​សមាជិក​ក្រុម​ជន​អន្ធពាល​ក្នុង​តំបន់ ការស៊ើបអង្កេត​នៅតែ​បន្ត​។ រដ្ឋមន្ត្រី​ក្រសួងការបរទេស​របស់​ប្រទេស​នេះ​លោក Claude Joseph បាន​ប្រាប់​សារព័ត៌មាន CNN ថា ក្រុម​មន្ត្រី​ហៃ​ទី​កំពុង​ទាក់ទង​ជាមួយ​ក្រសួងការបរទេស​អាមេរិក​អំពី​ការ​ចាប់​ជំរិត​នេះ​។​

​ក្រុម​សាសនទូត​បាន​ធ្វើ​ដំណើរ​តាម​រថយន្ត​កាលពី​ថ្ងៃ​សៅរ៍​ទៅកាន់​ភូមិ Titanyen ​ភាគ​ខាងជើង​នៃ​រដ្ឋធានី​ព័រ​-​អូ​-​ប្រាំង បន្ទាប់ពី​បាន​ទៅ​មើល​មណ្ឌល​កុមារ​កំព្រា​មួយ​នៅ​តំបន់ Croix des Bouquets។ ពួកគេ​ត្រូវ​បាន​ចាប់ជំរិត​តាម​បណ្ដោយ​ផ្លូវ​រវាង​កន្លែង​ទាំងពីរ​នោះ​។ ​លោក Dan Hooley អតីត​ប្រធាន​ផ្នែក​សម្រាប់​អង្គការ Christian Aid Ministries នៅ​ហៃ​ទី​បាន​ប្រាប់ CNN កាលពី​ថ្ងៃអាទិត្យ​ថា ​អ្នក​ផ្សព្វផ្សាយ​សាសនា​ដែល​ត្រូវ​បាន​ចាប់ជំរិត​ទាំងអស់​ ត្រូវ​បាន​គេ​ជឿ​ថា​ជិះ​នៅ​ក្នុង​រថយន្ត​តែមួយ ​ហើយ​អ្នកខ្លះ​អាច​ទាក់​ទង​ទៅកាន់​នាយក​មូលដ្ឋាន​របស់​អង្គការ​នេះ ​មុន​ពេល​ពួកគេ​ត្រូវ​បាន​គេ​ចាប់​យក​ទៅ​៕

អត្ថបទ៖ សុខមាន