​ប្រណាំង​រថយន្ត៖ ​មិនមាន​ព្រឹត្តិការណ៍ F1 នៅក្នុង​កាលវិភាគ​ប្រកួត​នៅ​រដូវ​កាល ២០២២ ឡើយ​ដោយសារតែ​វិបត្តិ Covid-19 នេះ​។ ​ទីលាន​នៅ​ទីក្រុង​សៀង​ហៃ​បាន​ផ្អាក​មិន​រៀបចំ​ការប្រកួត F1 តាំងពី​ការ​ផ្ទះ​ឡើង​ដំបូង​នៃ​មេរោគ​រាតត្បាត Covid-19 ហើយ​វិធានការ​តឹងរ៉ឹង​បច្ចុប្បន្ន​របស់​ចិន​ជុំវិញ​បញ្ហា Covid-19 នេះ មានន័យថា​ការប្រកួត​នៅលើ​ទឹកដី​ចិន​ពិតជា​មិនអាច​ទៅរួច​ឡើយ​។

​​កាលវិភាគ​ប្រកួត​រប​ស់​ចិន​ជា​រៀងរាល់ឆ្នាំ​គឺ​នៅ​ខែមេសា ខណៈ​អវត្តមាន​របស់​ចិន​នឹង​ជំនួស​ដោយ​ការប្រកួត​នៅ​ទីលាន Imola ប្រទេស​អ៊ីតាលី​នៅ​ថ្ងៃទី២៤ ខែមេសា​។ ​​មានតែ​ចិន​មួយ​ទេ​ដែល​នៅតែ​បន្ត​អវត្តមាន ក្រៅពីនេះ​រួមមាន​អូស្ត្រាលី កាណាដា សឹង្ហ​បុរី និង​ជប៉ុន​សុទ្ធតែ​ត្រលប់មក​ក្នុង​កាលវិភាគ​របស់ F1 វិញ​នៅ​ឆ្នាំ២០២២ ខាងមុខ​។​ ​​បួន​ប្រទេស​ខាងលើនេះ​សុទ្ធតែ​អវត្តមាន ២រដូវ​កាល​មកហើយ​ដោយសា​រវិ​ប​ត្តិ Covid-19 នេះ​។​

​​F1 នៅ​រដូវ​កាល ២០២២ ខាងមុខ​នឹងមាន​ការប្រកួត​ដល់​ទៅ ២៣ទីលានដែល​នេះ​ជា​ចំនួន​ច្រើន​បំផុត​ក្នុង​មួយ​រដូវ​កាល​របស់ F1​។ ​​រដូវ​កាល​ក្រោយ​ការប្រកួត​នឹង​ចេញ​ដំបូង​នៅ​ប្រទេស​បា​រ៉ែ​ន​ថ្ងៃទី២០ ខែមីនា និង​បិទ​បញ្ចប់​រដូវ​កាល​នៅ​ថ្ងៃទី២០ ខែវិច្ឆិកា​មានន័យថា ២៣ទីលាន​នេះ​ប្រកួត​ក្នុង​ចន្លោះ ៣៥សប្តាហ៍​។ ​​F1 ក៏បាន​គិតគូ​ពី​កាលវិភាគ​របស់ខ្លួន​មិនឱ្យ​ជាន់​នឹង World Cup ២០២២ ដែរ​ពោលគឺ​រដូវ​កាល ២០២២ នឹង​បញ្ចប់ ៣សប្តាហ៍​មុន World Cup៕

​អត្ថបទ​៖​នាង សុភា​វុ​ធ