ការបោះឆ្នោតនៅសហរដ្ឋអាមេរិកឆ្នាំ២០២៤នេះ ដែលបានធ្វើឡើងកាលពីថ្ងៃអង្គារ ទី៥ ខែវិច្ឆិកា ត្រូវបានកំណត់ថាក្លាយជាការចំណាយច្រើនបំផុតក្នុងប្រវត្តិសាស្ត្រ ដោយមានការរួមចំណែកសរុបឈានដល់១៥,៩ពាន់លានដុល្លារ។

យោងតាមអង្គការមិនរកប្រាក់ចំណេញ OpenSecrets បានឲ្យដឹងថាការចំណាយដែលរាប់បញ្ចូលទាំងការប្រកួតប្រជែងនៅក្នុងសភា កើនលើសពី១៥,១ពាន់លានដុល្លារអាមេរិក ដែលបានចំណាយក្នុងឆ្នាំ២០២០ និងច្រើនជាងទ្វេដងក្នុងឆ្នាំ២០១៦ ដែលមានចំនួនត្រឹមតែ៦,៥ពាន់លានដុល្លារ ។

នៅក្នុងការប្រកួតប្រជែងតំណែងប្រធានាធិបតីដ៏ក្តៅគគុក លោកស្រីKamala Harris បានលេចចេញជាអ្នកនាំមុខសម្រាប់ការរៃអង្គាសមូលនិធិ។ យុទ្ធនាការរបស់លោកស្រីផ្ទាល់ រៃអង្គាសប្រាក់បានជាង ១ពាន់លានដុល្លារអាមេរិក ដោយ៤០ភាគរយ បានមកពីម្ចាស់ជំនួយតូចៗ បូកបន្ថែម៥៨៦លានដុល្លារអាមេរិក បានមកពីគណៈកម្មាធិការសកម្មភាពនយោបាយដែលគាំទ្រ។

យុទ្ធនាការរបស់លោក ដូណាល់ ត្រាំ រៃអង្គាសប្រាក់ដោយផ្ទាល់បាន៣៨២លានដុល្លារ ដោយ ២៨ ភាគរយបានមកពីម្ចាស់ជំនួយតូចៗ ខណៈគណៈកម្មាធិការពាក់ព័ន្ធបានរួមចំណែកចំនួន៦៩៤ លានដុល្លារអាមេរិក។

អ្នកគាំទ្រគណបក្សសាធារណៈរដ្ឋសំខាន់ៗរួមមាន លោក Richard និង Elizabeth Uihlein មកពីឧស្សាហកម្មចម្រុះ មហាសេដ្ឋីកាស៊ីណូលោកស្រីMiriam Adelson នាយកប្រតិបត្តិក្រុមហ៊ុនTesla និង SpaceX លោក Elon Musk និងអ្នកវិនិយោគមូលនិធិការពារហានិភ័យ លោក Kenneth Griffin ដែលម្នាក់ៗបានរួមចំណែកជាង១០០លានដុល្លារអាមេរិកដល់លោកTrump និងគណបក្សសាធារណរដ្ឋ។

យោងតាមទិន្នន័យ ដែលចងក្រងដោយក្រុមហ៊ុនតាមដានការផ្សាយពាណិជ្ជកម្ម AdImpact បានឲ្យដឹងថា សរុបទាំងអស់ទឹកប្រាក់១០,៥ពាន់លានដុល្លារអាមេរិក ត្រូវបានចំណាយលើការ​ផ្សព្វផ្សាយសម្រាប់យុទ្ធនាការប្រកួតប្រជែង ចាប់ពីប្រធានាធិបតី រហូតដល់មន្ត្រីថ្នាក់តំបន់។