ជនអន្តោប្រវេសន៍មកពីគ្រប់ទិសទីនៃពិភពលោក ចាប់ពីអាមេរិកឡាទីន ទៅដល់ប្រទេសឆ្ងាយៗក្នុងទ្វីបអាហ្រ្វិក និងអាស៊ី ដែលកំពុងជ្រកកោននៅទីក្រុងម៉ិកស៊ិកភាគខាងជើង ក្នុងក្ដីសង្ឃឹមថានឹងចូលទៅសហរដ្ឋអាមេរិក ហើយគេចផុតពីការលំបាកផ្នែកសេដ្ឋកិច្ច កំពុងតែរង់ចាំមើលលទ្ធផលបោះឆ្នោតយ៉ាងអន្ទះសារបំផុត ហើយពួកគេកំពុងបារម្ភខ្លាចថាបេក្ខជនមកពីបក្សសាធារណរដ្ឋ លោក Donald Trump ទទួលជ័យជម្នះ។

លោកស្រី Kamala Harris មកពីបក្សប្រជាធិបតេយ្យ បានសន្យាថានឹងបន្តគោលនយោបាយរដ្ឋបាលលោកប្រធានាធិបតី Joe Biden នាពេលបច្ចុប្បន្ន ដែលកំណត់យ៉ាងខ្លាំងនូវសិទ្ធិជ្រកកោនសម្រាប់អ្នកដែលឆ្លងកាត់ព្រំដែនភាគខាងត្បូងដោយមិនរង់ចាំការណាត់ជួបតាមប្រព័ន្ធស្នើសុំសិទ្ធិជ្រកកោន CBP One។ ប៉ុន្តែលោក Trump បានប្តេជ្ញាបិទព្រំដែនអាមេរិក-ម៉ិកស៊ិកទាំងអស់ រួមទាំងការបញ្ចប់ដំណើរការ CBP One និងកម្មវិធីផ្សេងទៀតដែលអនុញ្ញាតឱ្យជនអន្តោប្រវេសន៍ចូលប្រទេសដោយស្របច្បាប់។

មេធាវីអន្តោប្រវេសន៍ លោកស្រី អាល់បា ហារ៉ាមីឡូ (Alba Jaramillo) បានព្យាយាមបន្ធូរបន្ថយភាពច្របូកច្របល់ និងក្ដីបារម្ភក្នុងចំណោមអ្នកនៅទីជម្រកនោះ ដោយប្រាប់ក្រុមជនអន្តោប្រវេសន៍ថាលទ្ធផលមិនទាន់ច្បាស់ទេ។

លោកស្រី Jaramillo បានជំរុញឱ្យពួកគេអត់ធ្មត់ និងជៀសវាងការស្តាប់ពាក្យចចាមអារ៉ាមតាមប្រព័ន្ធផ្សព្វផ្សាយសង្គមពីការផ្លាស់ប្តូរគោលនយោបាយរបស់សហរដ្ឋអាមេរិកភ្លាមៗក្នុងពេលត្រឹមតែមួយយប់៕