​ម៉ា​រ៉ា​តុង៖ ​អត្ត​ព​លិ​កកេ​ន​យ៉ា Elisha Rotich និង​កីឡាការិនី​អេ​ចូ​ពី Tigist Memuye គឺជា​អ្នកឈ្នះ​ក្នុង​ព្រឹត្តិការណ៍​រត់​ម៉ា​រ៉ា​តុង​អន្តរជាតិ​ទីក្រុង​ប៉ារីស​ប្រទេស​បារាំង​កាលពី​ថ្ងៃអាទិត្យ​។ ​សំរាប់​ការប្រកួត​ផ្នែក​បុរស Elisha Rotich បានកំណត់​ត្រា​ពេលវេលា​ល្អ​បំផុត​នៅ​ទីក្រុង​ប៉ារីស​នេះ ​បំបែក​កំណត់ត្រា​ចាស់​ជាមួយនឹង​ថេរវេលា ២ម៉ោង ៤​នាទី ២១វិនាទី តាម​ពីក្រោយ​ដោយ​កីឡាករ​អេ​ចូ​ពី Hailemaryam Kiros​។

​​កីឡាករ​វ័យ ៣១ឆ្នាំ Elisha Rotich បានកំណត់​ថេរវេលា​នេះ​បំបែក​កំណត់ត្រា​ផ្ទាល់ខ្លួន​ជិត​មួយ​នាទី និង​បំបែក​កំណត់ត្រា​របស់ Kenenisa Bekele កាលពី ៧ឆ្នាំ​ដែល​ធ្វើបាន ២ម៉ោង ៥នាទី ៤វិនាទី​នៅពេលនោះ​។ ​កីឡាករ​កេ​ន​យ៉ា​មួយរូប​ទៀត​គឺ Hillary Kipsambu ទទួលបាន​ចំនាត់ថ្នាក់​លេខ៣​។ ​​ចំណែក​ការប្រកួត​ផ្នែក​នារី កីឡាការិនី​សញ្ជាតិ​អេ​ចូ​ពី Tigist Memuye បាន​យកឈ្នះ​ការប្រកួត​ជាមួយនឹង​ថេរវេលា ២ម៉ោង ២៦នាទី ១២វិនាទី តាម​ពីក្រោយ ៣វិនាទី​ដោយ​កីឡាការិនី Yenenesh Dinkesa និង​លេខ៣ Fantu Jimma សុទ្ធតែ​មកពី​ប្រទេស​អេ​ចូ​ពី​ទាំងអស់​។

​​សូមបញ្ជាក់ថា​ ព្រឹត្តិការណ៍​ម៉ា​រ៉ា​តុង​ទីក្រុង​ប៉ារីស​ឆ្នាំនេះ​មាន​អ្នកចូលរួម​សរុប​ប្រមាណ ៦ម៉ឺន​នាក់​មកពី ១៤៥ប្រទេស​ជុំវិញ​ពិភពលោក ហើយ​ការប្រកួត​ពី​ដើមឡើយ​តែងតែ​រៀបចំ​នៅ​អំឡុង​ខែ​មេសា តែ​ត្រូវ​ពន្យារពេល ៦​ខែ​ដោយសារ​បញ្ហា Covid-19៕

​អត្ថបទ​៖​នាង សុភា​វុ​ធ