លោក Liu Pengyu អ្នកនាំពាក្យស្ថានទូតចិនប្រចាំសហរដ្ឋអាមេរិក បានថ្លែងប្រាប់សារព័ត៌មាន TASS ថា ទីក្រុងប៉េកាំងរំពឹងថា ទីក្រុងវ៉ាស៊ីនតោន នឹងស្វែងរកការអភិវឌ្ឍទំនាក់ទំនងជាមួយប្រទេសចិន ដោយមិនគិតពីនរណាជាអ្នកជាប់ឆ្នោតជាប្រធានាធិបតីអាមេរិកឡើយ។

លោកបានចង្អុលបង្ហាញថា៖«ការបោះឆ្នោតប្រធានាធិបតី គឺជាកិច្ចការផ្ទៃក្នុងរបស់សហរដ្ឋអាមេរិក។ ប្រទេសចិនដែលបានប្តេជ្ញាចិត្តចំពោះគោលការណ៍មិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃ នឹងមិនជ្រៀតជ្រែកក្នុងការបោះឆ្នោតប្រធានាធិបតីអាមេរិកទេ»។

លោក Liu បានបន្ថែមថា៖«ការអភិវឌ្ឍទំនាក់ទំនងចិន-អាមេរិក គឺស្ថិតនៅក្នុងផលប្រយោជន៍ជាមូលដ្ឋានរបស់ប្រជាជនយើងទាំងពីរ និងប្រទេសទាំងពីរ ហើយបំពេញតាមការរំពឹងទុករបស់សហគមន៍អន្តរជាតិ។ ទោះបីជាអ្នកណាដែលត្រូវជាប់ជាប្រធានាធិបតីអាមេរិកក៏ដោយ យើងសង្ឃឹមថា សហរដ្ឋអាមេរិក នឹងធ្វើការជាមួយយើង ក្នុងទិសដៅដូចគ្នា អនុវត្តតាមគោលការណ៍នៃការគោរពគ្នាទៅវិញទៅមក ទំនាក់ទំនង សន្តវិជ្ជមាន និងកិច្ចសហប្រតិបត្តិការឈ្នះ-ឈ្នះ និងជំរុញកំណើនទំនាក់ទំនងទ្វេភាគីប្រកបដោយស្ថិរភាព រ៉ឹងមាំ និងប្រកបដោយនិរន្តរភាព ដើម្បីផលប្រយោជន៍នៃប្រទេសទាំងពីរ និងពិភពលោកទាំងមូល»។

លោកបានសង្កត់ធ្ងន់ថា៖«ទន្ទឹមនឹងនោះ យើងនឹងបន្តរក្សាយ៉ាងរ៉ឹងមាំនូវអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់យើង»។