ក្រុមមន្ត្រីបាននិយាយថា រដ្ឋាភិបាលឥណ្ឌូនេស៊ីគ្រោងនឹងផ្លាស់ប្តូរទីលំនៅអចិន្ត្រៃយ៍ សម្រាប់អ្នកស្រុករាប់ពាន់នាក់ បន្ទាប់ពីមានការផ្ទុះជាបន្តបន្ទាប់របស់ភ្នំភ្លើង Lewotobi Laki-laki ដែលបានសម្លាប់មនុស្ស ១០នាក់ និងបំផ្លិចបំផ្លាញផ្ទះរាប់ពាន់ខ្នង។

ភ្នំភ្លើង Lewotobi Laki-laki ស្ថិតនៅលើកោះ Flores ក្នុងខេត្ត Nusa Tenggara ខាងកើត បានផ្ទុះឡើងកាលពីយប់ថ្ងៃអាទិត្យចុងសប្ដាហ៍កន្លងមក ដោយតាមមកដោយការផ្ទុះតូចៗ កាលពីថ្ងៃចន្ទ និងថ្ងៃអង្គារ ហើយនៅតែស្ថិតក្នុងស្ថានភាពប្រកាសអាសន្នខ្ពស់បំផុតអំពីភ្នំភ្លើងនេះ។

ប្រធានទីភ្នាក់ងារគ្រោះមហន្តរាយរបស់ប្រទេសឥណ្ឌូនេស៊ី លោក Suharyanto បានឲ្យដឹងនៅក្នុងសេចក្តីថ្លែងការណ៍នាថ្ងៃពុធនេះថា ការផ្លាស់ប្តូរទីលំនៅអចិន្ត្រៃយ៍ត្រូវបានចាត់ទុកថា ជា «វិធានការកាត់បន្ថយរយៈពេលវែង» ដើម្បីប្រមើលមើលការផ្ទុះស្រដៀងគ្នានេះ នាពេលអនាគត។

ជាមួយគ្នានេះ លោកបានបន្ថែមថា រដ្ឋាភិបាលមានបំណងផ្លាស់ប្តូរទីលំនៅអ្នកស្រុកទាំងអស់ដែលរស់នៅក្នុងរង្វង់ចម្ងាយ ៧គីឡូម៉ែត្រពីមាត់ភ្នំភ្លើង។

គួរបញ្ជាក់ថា មានអ្នកស្រុកជាង ១៦.០០០នាក់ រស់នៅក្នុងភូមិដែលនៅជិតភ្នំភ្លើងបំផុត ប៉ុន្តែរដ្ឋាភិបាលនៅតែកំពុងគណនាថា តើអ្នកស្រុកប៉ុន្មាននាក់ នឹងត្រូវផ្លាស់ទីលំនៅជាអចិន្ត្រៃយ៍។ លោក Heronimus Lamawuran អ្នកនាំពាក្យរបស់រដ្ឋាភិបាលតំបន់ Flores ខាងកើត បាននិយាយថា គិតត្រឹមព្រឹកថ្ងៃពុធ មនុស្សយ៉ាងហោចណាស់ ២.៥០០នាក់ត្រូវបានជម្លៀសចេញ៕