អ្នកនាំពាក្យរបស់ប្រមុខUN លោក Stephane Dujarric បាននិយាយនៅក្នុងសន្និសីទសារព័ត៌មានប្រចាំថ្ងៃកាលពីថ្ងៃអង្គារថា ទីភ្នាក់ងារនិងដៃគូរបស់អង្គការសហប្រជាជាតិ បន្តផ្តល់ជំនួយមនុស្សធម៌ដល់   ប្រជាជនដែលរងផលប៉ះពាល់ដោយវិបត្តិ នៅក្នុងប្រទេសលីបង់ ចំពេលមានអរិភាពកាន់តែខ្លាំងឡើង។  

កាលពីថ្ងៃចន្ទ ទីភ្នាក់ងារជំនួយនិងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA) បានបញ្ជូនសម្ភារៈផ្គត់ផ្គង់វេជ្ជសាស្រ្ត និងប្រេងឥន្ធនៈសម្រាប់ម៉ាស៊ីនភ្លើង ទៅកាន់ជំរំជនភៀសខ្លួន ប៉ាឡេស្ទីន Burj Shimali នៅទីក្រុង Tire ភាគខាងត្បូងប្រទេសលីបង់។ ក្បួន     រថយន្តជំនួយមនុស្សធម៌ ក៏បានប្រគល់សម្ភារវេជ្ជសាស្រ្ដ ឱសថ និងឧបករណ៍អនាម័យ ដល់មណ្ឌលថែទាំសុខភាពនៅភូមិ Labweh ដែលមានទីតាំងក្នុងតំបន់ Baalbeck-El Hermel។

ទន្ទឹមនឹងនេះ កម្មវិធីស្បៀងអាហារពិភពលោក (WFP) បានទៅដល់ជនងាយរងគ្រោះជាង ២ លាននាក់រួចហើយនៅក្នុងប្រទេសនេះ តាមរយៈជំនួយសង្គ្រោះបន្ទាន់របស់ខ្លួន ក៏ដូចជាកម្មវិធីនានាផងដែរ។ អង្គការ WFP ក៏កំពុងផ្តល់ជំនួយស្បៀងអាហារដល់ប្រជាជនលីបង់ និងស៊ីរី ដែលភៀសខ្លួនឆ្លង   ព្រំដែនចូលទៅប្រទេសស៊ីរី។

មូលនិធិកុមាររបស់អង្គការសហប្រជាជាតិ (UNICEF) កំពុងចាប់ដៃគូជាមួយអាជ្ញាធរមូលដ្ឋាន ដើម្បីជួយសម្រួលដល់ការវិលត្រឡប់ទៅរៀនវិញបន្តិចម្តងៗសម្រាប់កុមារលីបង់ប្រមាណ ៣៨៧.000នាក់ រួមទាំងអ្នកដែលស្នាក់នៅក្នុងជម្រក និងសហគមន៍ ដែលរងផលប៉ះពាល់ដោយសង្រ្គាម។