រុស្ស៊ី៖ ​យានអវកាស Soyuz ដែល​ដឹក​អវកាសយានិក​ម្នាក់​ និង​ផលិតករ​ខ្សែភាពយន្ត​រុស្ស៊ី​ ២​នាក់​បាន​វិលត្រឡប់​មកកាន់​ភព​ផែនដី​វិញ បន្ទាប់ពី​ចាកចេញ​ពី​ស្ថានីយ​អវកាស​អន្តរជាតិ (ISS) កាលពី​ព្រឹក​ថ្ងៃអាទិត្យ​។

​យានអវកាស​នេះ​បាន​ចុះចត​នៅ​លើ​តំបន់​ក្នុង​ប្រទេស​កា​ហ្សា​ក់​ស្ថាន ដែល​ផ្ទុក​តារា​សម្ដែង​ជនជាតិ​រុស្ស៊ី​នាង Yulia Peresild និង​អ្នកដឹក​នាំ​រឿង​លោក Klim Shipenko ដែល​បាន​វិល​ត្រឡប់​មក​ភព​ផែនដី​វិញ ​បន្ទាប់ពី​ថត​ឈុត​ឆាក​សម្រាប់​ខ្សែភាពយន្ត​ដំបូង​របស់​ពិភពលោក​ក្នុង​គន្លង​គោចរ ជា​គម្រោង​ដែល​វិមាន​ក្រឹម​ឡាំង​បាន​និយាយ​ថា ​នឹង​ជួយ​សាង​កេរ្តិ៍ឈ្មោះ​កាន់តែ​ល្បីល្បាញ​ក្នុង​វិស័យ​អវកាស​របស់​ប្រទេស​នេះ​។​ ​តារាភាពយន្តនាង Peresild និង​លោក Shipenko បាន​ហោះ​ចូល​គន្លង​គោចរ​ក្នុង​យានអវកាស Soyuz របស់​រុស្ស៊ី​កាលពី​ថ្ងៃទី​៥ ខែតុលាសម្រាប់​រយៈពេល ១២​ថ្ងៃ​នៅ​លើ​ស្ថានីយ​អវកាស​ដើម្បី​ថត​ផ្នែក​ខ្លះ​នៃ​ខ្សែភាពយន្ត​ដែល​មាន​ចំណងជើង​ថា ​“Challenge” ដែល​តួ​អង្គ​គ្រូពេទ្យ​ជំនាញ​វះកាត់​សម្ដែង​ដោយ​នាង Peresild ត្រូវ​ប្រញាប់​ឡើង​ទៅ​កាន់​ស្ថានីយ​អវកាស​ដើម្បី​ជួយសង្គ្រោះ​សមាជិក​អវកាសយានិក​ម្នាក់ ដែល​ត្រូវការ​ការវះកាត់​បន្ទាន់​នៅ​ក្នុង​គន្លង​តារាវិថី​នោះ​។​

​អ្នក​ទាំង​ពីរ​បាន​វិលត្រឡប់​មកកាន់​ភព​ផែនដី​វិញ​កាលពី​ថ្ងៃអាទិត្យ​ ជាមួយ​អវកាសយានិក​រុស្ស៊ី​ម្នាក់​ទៀត​គឺ​លោក Oleg Novitskiy ដែល​បាន​ចូលរួម​សម្ដែង​ជា​តួ​អង្គ​អវកាសយានិក​មាន​ជំងឺ​នៅ​ក្នុង​ខ្សែភាពយន្ត​នេះ​៕

អត្ថបទ៖ សុខមាន