នៅថ្ងៃពុធនេះ លោក Donald Trump បានប្រកាសជ័យជំនះនៅការបោះឆ្នោតប្រធានាធិបតីសហរដ្ឋអាមេរិកឆ្នាំ ២០២៤ ដោយលោកនិយាយប្រាប់ក្រុមអ្នកគាំទ្រថា អាមេរិកបានផ្តល់ឲ្យពួកគេនូវអាណត្តិពុំធ្លាប់ដែលមានពីមុនមក ។

 ថ្លែងនៅក្នុងរដ្ឋ Florida មិនយូរប៉ុន្មានក្រោយការព្យាករណ៍ផ្តល់ជ័យជំនះដល់លោកនៅក្នុងរដ្ឋប្រទាញប្រទង់ Pennsylvania លោក Trumpបាននិយាយប្រាប់ហ្វូងមនុស្សសប្បាយរីករាយថា លោកនឹងប្រយុទ្ធដើម្បីពលរដ្ឋគ្រប់គ្នា ។

 លោក Trumpនិយាយថា ពួកយើងបានបង្កើតប្រវត្តិសាស្រ្តសម្រាប់ហេតុផលមួយនៅយប់នេះ ហើយហេតុផលនោះគឺពួកយើងបានយកឈ្នះឧបសគ្គដែលគ្មាននរណាម្នាក់គិតដល់។

លោកថា នេះគឺជាជ័យជំនះដ៏អស្ចារ្យមួយសម្រាប់ពលរដ្ឋអាមេរិក ដែលអនុញ្ញាតឲ្យពួកយើងធ្វើឲ្យអាមេរិកអស្ចារ្យម្តងទៀត ។

មនុស្សសំខាន់ៗភាគច្រើននៅក្នុងជីវិតនយោបាយ និងជីវិតផ្ទាល់ខ្លួនរបស់លោក Trump បានចូលរួមជាមួយលោកលើវេទិកានៅទីក្រុង West Palm Beach ។

អតីតស្រ្តីទី ១ Melania Trump បានឈរជិតស្វាមីរបស់លោកស្រី ហើយនិងត្រូវបានចូលរួមដោយលោក Barron ដែលជាកូនប្រុសពៅរបស់អតីតប្រធានាធិបតីរូបនេះ ។ កូនច្បងរបស់លោក Trump លោក Don Jr, Eric, Ivanka និងលោក Tiffany ពួកគេទាំងអស់គ្នា បានចួលរួមជាមួយឪពុករបស់ពួកគេនៅលើវេទិកាផងដែរ ។

ស្របពេលមានការស្រែកពាក្យ “សហរដ្ឋអាមេរិក” និង “ពួកយើងស្រលាញ់អ្នក” លោក Trumpនិយាយថា អាមេរិកបានឲ្យផ្តល់ឲ្យពួកយើងនូវអាណត្តិពុំធ្លាប់ដែលមានពីមុនមក ។

លោកនិយាយដោយសំដៅលើតំណែងប្រធានាធិបតីគឺជាការងារសំខាន់បំផុតនៅលើពិភពលោកថា មនុស្សជាច្រើន បាននិយាយប្រាប់ខ្ញុំថា ព្រះបានប្រោសប្រទានជីវិតដល់ខ្ញុំដោយហេតុផលមួយ ហើយហេតុផលនោះ គឺសង្រ្គោះប្រទេសរបស់ពួកយើង និងធ្វើឲ្យអាមេរិកមានភាពអស្ចារ្យឡើងវិញ ។

អតីតប្រធានាធិបតីវ័យ ៧៨ឆ្នាំរូបនេះ នៅត្រូវការអង្គបោះឆ្នោតប៉ុន្មានទៀតនៅក្នុងចំណោមអង្គបោះឆ្នោតចំនួន ២៧០ សម្រាប់ជ័យជំនះទាំងស្រុង ប៉ុន្តែវាទំនងដូចការសន្និដ្ឋានចៀសមិនរួចនោះទេនៅក្នុងដំណាក់កាលនេះ ៕