អាហ្វ្រិកខាងត្បូង និងអង់គ្លេស បានយល់ព្រមពង្រឹងទំនាក់ទំនងពាណិជ្ជកម្ម និងកិច្ចសហប្រតិបត្តិការការពារជាតិ ក្រោយជំនួបរដ្ឋមន្រ្តីការបរទេសប្រទេសទាំង ២កាលពីថ្ងៃអង្គារ ។

អាហ្វ្រិកខាងត្បូង បានក្លាយជាដៃគូពាណិជ្ជកម្មធំបំផុតរួចទៅហើយរបស់អង់គ្លេសនៅទ្វីបអាហ្វ្រិក ហើយអង់គ្លេស ស្ថិតក្នុងចំណោមគោលដៅកំពូលចំនួន ៥ សម្រាប់ការនាំចេញរបស់អាហ្វ្រិកខាងត្បូង រួមទាំងលោហៈធាតុមានតម្លៃ រថយន្ត និងផលិតផលកសិកម្ម ។

យោងតាមទិន្នន័យសេវាកម្មប្រាក់ចំណូលអាហ្វ្រិកខាងត្បូង បានឲ្យដឹងថា ពាណិជ្ជកម្មទ្វេភាគីរវាងប្រទេសទាំង ២ មានតម្លៃសរុប ៧,៦២ពាន់លានដុល្លារ កាលពីឆ្នាំមុន ។

អំឡុងជំនួបជាមួយសមភាគីអាហ្វ្រិកខាងត្បូងលោក Ronald Lamola រដ្ឋមន្រ្តីការបរទេសអង់គ្លេស លោក David Lammy និយាយថា ពួកយើងបានប្តេជ្ញាចិត្តចំពោះផែនការកំណើនទំនាក់ទំនងចក្រភពអង់គ្លេស-អាហ្វ្រិកខាងត្បូង ដែលនឹងជួយអភិវឌ្ឍសេដ្ឋកិច្ច និងពង្រឹងទំនាក់ទំនងពាណិជ្ជកម្ម ហើយនិងការវិនិយោគទុន ។

ទោះបីជាយ៉ាងណាក៏ដោយ លោកពុំបានផ្តល់សេចក្តីលម្អិតពីផែនការមួយនេះឡើយ បើទោះបីជាការិយាល័យរបស់លោកនិយាយថា វានឹងរួមបញ្ចូលកម្មវិធីបង្កើនចំនួនការងារក្នុងវិស័យកសិកម្មតាមតំបន់ជនបទនៅអាហ្វ្រិកខាងត្បូង ពង្រឹងការនាំចេញទៅកាន់អង់គ្លេស ។

លោក Lammy និយាយថា លើវិស័យការពារជាតិ ប្រទេសទាំង ២ បានប្តេជ្ញាចិត្តពង្រឹងកិច្ចសហប្រតិបត្តិការលើការប្រយុទ្ធប្រឆាំងអំពើភេរវកម្ម ហើយពួកគេបានពិភាក្សាផងដែរលើគោលដៅចែករំលែកសម្រាប់ការផ្លាស់ប្តូរថាមពលដ៏យុត្តិធម៌ ៕