ក្រុមឆ្មាំល្បាតឆ្នេរអេស្ប៉ាញ និយាយកាលពីថ្ងៃអង្គារថា ពួកគេបានដឹកសាកសពជនអន្តោប្រវេសន៍ ២នាក់ ទៅកាន់កំពង់ផែ Naos ស្ថិតក្នុងទីក្រុង Arrecife ក្រោយពួកគេបានរកឃើញទូកអន្តោប្រវេសន៍នៅជិតកោះ Lanzarote ស្ថិតក្នុងប្រជុំកោះ Canary ។

ក្រុមអាជ្ញាធរនិយាយថា មនុស្សយ៉ាងហោច ២២៥នាក់ ត្រូវបានជួយសង្រ្គោះចេញពីទូកជនអន្តោប្រវេសន៍ ៣គ្រឿងផ្សេងទៀត ហើយពួកគេមួយចំនួន ត្រូវបានបញ្ជូនឡើងរថយន្តក្រុងដឹកពួកគេទៅកាន់កោះផ្សេងទៀត ។

ប្រធានក្រុមប្រឹក្សាកោះ Lanzarote បាននិយាយប្រាប់ក្រុមអ្នកសារព័ត៌មានថា ពួកគេបានបង្ខំចិត្តប្រើប្រាស់សំពត់តង់ដំឡើងនៅកំពង់ផែ ស្របពេលដែលកោះមួយនេះ បានទទួលជនអន្តោប្រវេសន៍ជាង ១.២០០នាក់ កាលពីចុងសប្តាហ៍កន្លងទៅ ហើយនិងជំរុញឲ្យក្រុមអាជ្ញាធរផ្តល់មធ្យោបាយចាំបាច់ ដើម្បីផ្តល់ជំនួយសមស្របដល់ពួកគេ ។

សេវាកម្មសមុទ្រអេស្ប៉ាញ និយាយប្រាប់ទីភ្នាក់ងារព័ត៌មានរ៉យទ័រថា កាលពីថ្ងៃអាទិត្យ សាកសពមនុស្ស ៥នាក់ ត្រូវបានប្រទះឃើញអណ្តែតនៅក្នុងសមុទ្រ ក្រោយទូកពោងមួយគ្រឿងដែលពួកគេធ្វើដំណើរ បានអស់ខ្យល់នៅចម្ងាយប្រហែល ៩០គ.មពីកោះ Lanzarote របស់អេស្ប៉ាញ ។

អ្នកនាំពាក្យម្នាក់ និយាយថា យន្តហោះជួយសង្រ្គោះ បានប្រទះឃើញទូកពោង ២គ្រឿងធ្វើដំណើរឆ្ពៅទៅកាន់ប្រជុំកោះ Canary ហើយក្នុងនោះទូកមួយគ្រឿង បានអស់ខ្យល់ ។

 យន្តហោះជួយសង្រ្គោះ បានសង្រ្គោះ មនុស្ស ១៧នាក់ពីទូកមួយគ្រឿងនេះ ហើយនិងមនុស្ស ៨០នាក់ ពីទូកមួយគ្រឿងទៀត ប៉ុន្តែសាកសពមនុស្ស ៥នាក់ ត្រូវបានប្រទះឃើញ ។

 ទីភ្នាក់ងាររដ្ឋ EFE និយាយថា សេវាកម្មជួយសង្រ្គោះ បានជួយសង្រ្គោះមនុស្សទាំងអស់ជាង ១.៥០០នាក់ កាលពីចុងសប្តាហ៍កន្លងទៅ ។

 ពួកគេបានរាយការណ៍កាលពីថ្ងៃអាទិត្យថា ជនអន្តោប្រវេសន៍យ៉ាងហោច ៤៨នាក់ បានស្លាប់ ពេលព្យាយាមទៅដល់ប្រជុំកោះ Canary នៅលើទូកមួយគ្រឿងដែលបានចាកចេញពីប្រទេសម៉ូរីតានី កាលពីរយៈពេល ៣សប្តាហ៍មុន ៕