ព្រៃវែង ៖ រដ្ឋលេខាធិការក្រសួងអភិវឌ្ឍន៍ជនបទ ឯកឧត្តម ជ្រុន ថេរ៉ាវ៉ាត បានធ្វើការអំពាវនាវ​ដល់​បងប្អូនជនរួម ជាតិទាំងអស់គប្បីលាងសម្អាតដៃឲ្យបានគ្រប់ពេលវេលា និងជាប់លាប់បំផុត ខណៈដៃគឺជាធម្យោបាយ ចម្លងរបស់មេរោគគ្រប់ប្រភេទ ។ ប្រសិនបើគ្រប់គ្នា កង្វះអនាម័យក្នុងការរស់នៅប្រចាំថ្ងៃ គឺជាមូលហេតុចម្បងដែលធ្វើឲ្យមានជំងឺប៉ះពាល់ដល់សុខភាព បង្អាក់ការលូតលាស់របស់កុមារ និងប៉ះពាល់ដល់ អាយុជីវិតផងដែរ។

ថ្លែងនៅក្នុងពិធីអបអរសាទរ ទិវាពិភពលោកលាងសំអាតដៃ ក្រោមប្រធានបទ«អនាគតយើងស្ថិត នៅលើដៃរបស់យើង សូមចូលរួមលាងសំអាតដៃទាំងអស់គ្នា» នាព្រឹកថ្ងៃទី១៨ ខែតុលា ឆ្នាំ២០២១នេះ នៅស្រុកពាមរក៍ខេត្តព្រៃវែង ឯកឧត្តម ជ្រុន ថេរ៉ាវ៉ាត បានលើកឡើងថា បងប្អូន​ប្រជាពលរដ្ឋទាំងអស់គប្បី អនុវត្តសកម្មភាពលាងសម្អាតដៃនឹងសាប៊ូជាប្រចាំទាំងអស់គ្នា ដោយ​សារថា« ដៃរបស់យើង គឺជាអនាគតរបស់យើង» ហើយដៃនេះគឺជាប្រភពធំបំផុតនៃ​ការឆ្លងរីក​រាលដាលនូវមេរោគគ្រប់ប្រភេទ ជាពិសេសគឺ មេរោគកូវីដ១៩ផងដែរ ប្រសិនបើយើងគ្មាន​ការ​សម្អាតវាឲ្យបានត្រឹមត្រូវទេនោះ ។

ឯកឧត្តម បានបញ្ជាក់បន្ថែមថា«កាលាងសម្អាតដៃនឹងសាប៊ូបានញឹកញាប់ជាប្រចាំ មុនពេល​បរិភោគ​ចំណីអាហារ និងក្រោយពេលបន្ទោបង់​ ជាសកម្មភាពសាមញ្ញងាយស្រួលអនុវត្ត ចំណាយ​ថវិកាតិច តែទទួលបានផលចំណេញច្រើន ជាពិសេសអាចកាត់បន្ថយហានិភ័យនៃការឆ្លង​មេរោគ​កូវីដ១៩ ដែលពិភពលោកទាំងមូល រួមទាំងកម្ពុជាកំពុងប្រឈមនឹងការរីករាលដាលយ៉ាងធ្ងន់ធ្ងរ។ ការលាងសម្អាត ដៃពិតជាមានសារៈសំខាន់ណាស់ក្នុងការបង្ការទប់ស្កាត់ការចម្លងជំងឺកូវីដ១៩»។

ជាមួយគ្នានោះដែរ ឯកឧត្តមជ្រុន ថេរ៉ាវ៉ាត ក៏បានសម្តែងការរំពឹងទុកផងដែរថា ការប្តេជ្ញាចិត្តខិតខំ ប្រឹងប្រែងប្រតិបត្តិអនាម័យ តាមរយៈការសង់និងប្រើប្រាស់បង្គន់ ការលាងសំអាតដៃ​នឹង​សាប៊ូ​ញឹកញាប់ ​និងការផឹកទឹកមានសុវត្ថិភាព គឺដើម្បីសុខភាពយើងទាំងអស់គ្នា សំដៅ​ធានាការ​រស់នៅប្រកបដោយភាព ​ថ្លៃថ្នូរ​ ភាពសំបូររុងរឿងរបស់ប្រជាពលរដ្ឋគ្រប់រូប ដែលទាំង​អស់នេះ​គឺជាការទទួលខុសត្រូវ របស់យើងទាំង អស់គ្នា តាមមុខនាទីរៀងៗខ្លួន និងផ្តើមចេញពីយើងទាំង​អស់គ្នាផងដែរ។

សូមបញ្ជាក់ថា ការ​ប្រារព្ធ​ពិធីអបអរសាទរ ទិវាពិភពលោកលាងសំអាតដៃនេះ គឺមានគោល​បំណង​ជំរុញ ឲ្យចលនាការលាងសំអាតដៃ ឲ្យក្លាយទៅជា ទម្លាប់របស់មនុស្សគ្រប់រូប មិនថារស់នៅទីជន បទ សហគមន៍ដាច់ស្រយាល ទីប្រជុំជនអ្វីនោះឡើយ គឺត្រូវធ្វើការសំអាតដៃឲ្យបានគ្រប់ៗគ្នា និងគ្រប់ពេលដែលអាចធ្វើទៅបាននោះ៕

អត្ថបទ ៖ បាន ចក់