សារព័ត៌មាន Asharq al-Awsat របស់អារ៉ាប៊ីសាអ៊ូឌីត បាននិយាយដោយដកស្រង់សម្តីអ្នកជំនាញក្នុងស្រុកថា ទីក្រុង និងភូមិចំនួន២៩ នៅភាគខាងត្បូងប្រទេសលីបង់ ត្រូវបានបំផ្លាញទាំងស្រុង នៅក្នុងដំណើរការនៃប្រតិបត្តិការជើងគោករបស់អ៊ីស្រាអែល ដែលបានចាប់ផ្តើម នៅថ្ងៃទី ០១ ខែតុលា ឆ្នាំ ២០២៤។

យោងតាមសារព័ត៌មាននេះ បានឲ្យដឹងថា អស់រយៈពេលពេញមួយខែ អង្គភាពអ៊ីស្រាអែល បានដាក់មីន និងបំផ្ទុះផ្ទះជាច្រើនខ្នង នៅក្នុងតំបន់តាំងទីលំនៅ ដែលស្ថិតនៅតាមខ្សែបន្ទាត់ព្រំដែនមានប្រវែង ១២០ គីឡូម៉ែត្រពីទីក្រុង Ras Al Naqoura ទៅទីក្រុង Shebaa ។ សរុបមក តាមការប៉ាន់ប្រមាណរបស់អ្នកជំនាញ ផ្ទះប្រហែល ២៥.000ខ្នង ត្រូវបានបំផ្លាញទាំងស្រុង។

កាសែតនេះ បានដកស្រង់សម្តីអ្នកវិភាគយោធា លោកឧត្តមសេនីយ៍ Hassan Juni ដោយនិយាយថា សកម្មភាពបែបនេះ បង្ហាញពីផែនការរបស់អ៊ីស្រាអែល ក្នុងការបង្កើត «តំបន់ទ្រនាប់គ្មានមនុស្សរស់នៅ ដែលមានជម្រៅ ៣-៥គីឡូម៉ែត្រ នៅក្នុងទឹកដីលីបង់»។ ការខូចខាតរបស់ប្រទេសលីបង់ ត្រូវបានប៉ាន់ប្រមាណថា មានចំនួន ២០ ពាន់លានដុល្លារ។