ប្រទេសចិន នៅថ្ងៃពុធ (ទី៦ ខែវិច្ឆិកា) នេះ បានប្រាប់ឲ្យដឹងថា ខ្លួននឹងធ្វើការជាមួយសហរដ្ឋអាមេរិកដោយឈរលើមូលដ្ឋាននៃការគោរពគ្នាទៅវិញទៅមក បន្ទាប់ពីលោក Donald Trump បានទទួលជ័យជម្នះ នៅក្នុងការបោះឆ្នោតប្រធានាធិបតី ប៉ុន្តែអ្នកយុទ្ធសាស្រ្តបានលើកឡើងថា ទីក្រុងប៉េកាំងកំពុងត្រៀមប្រឈមនឹងការប្រកួតប្រជែងពីមហាអំណាចដ៏ស្រួចស្រាល់មួយនេះ ជុំវិញបញ្ហាពាណិជ្ជកម្ម បច្ចេកវិទ្យា និងសន្តិសុខ។

នៅឯសន្និសីទសារព័ត៌មានប្រចាំថ្ងៃ ក្នុងទីក្រុងប៉េកាំង នៅពេលត្រូវបានសួរថា តើការវិលត្រឡប់របស់លោក Trump ទៅការិយាល័យ Oval វិញ នឹងប៉ះពាល់ដល់ទំនាក់ទំនង រវាងសហរដ្ឋអាមេរិក និងចិនយ៉ាងដូចម្តេចដែរ អ្នកនាំពាក្យក្រសួងការបរទេស លោកស្រី Mao Ning បាននិយាយថា៖ «គោលនយោបាយរបស់ យើងចំពោះសហរដ្ឋអាមេរិក គឺមិនផ្លាស់ប្ដូរនោះទេ»។

លោកស្រីបានបន្ថែមថា៖ «យើងនឹងបន្តមើល និងដោះស្រាយទំនាក់ទំនងចិន-អាមេរិក តាមគោលការណ៍នៃការគោរពគ្នាទៅវិញទៅមក ការរួមរស់ជាមួយគ្នាដោយសន្តិភាព និងកិច្ចសហប្រតិបត្តិការឈ្នះ ឈ្នះ»។

តែទោះជាយ៉ាងណាក្ដី បណ្ដាអ្នកយុទ្ធសាស្រ្តចិន បាននិយាយថា ពួកគេរំពឹងថា នឹងមានវោហាសាស្ត្រដាក់គ្នាដ៏ស្រួចស្រាល់ និងអាចមានការដំឡើងពន្ធគយខ្ពស់ពីលោក Trump ទោះបីជាអ្នកខ្លះ បានលើកឡើងថា គោលនយោបាយការបរទេសបែបឯកោរបស់លោកអាចផ្តល់ឲ្យទីក្រុងប៉េកាំងនូវចន្លោះទំនេរ ដើម្បីពង្រីកឥទ្ធិពលពិភពលោករបស់ខ្លួនក៏ដោយ។

គួរបញ្ជាក់ថា លោក Trump បានស្នើដំឡើងពន្ធលើការនាំចូលរបស់ចិនលើសពី ៦០ភាគរយ ហើយក្រុមអ្នកវិភាគនិយាយថា ការរំពឹងទុកពីការមានសង្គ្រាមពាណិជ្ជកម្ម បានរំខានដល់ភាពជាអ្នកដឹកនាំរបស់ប្រទេសចិន៕