ក្រសួងការពារជាតិវៀតណាមបានឲ្យដឹងនៅក្នុងសេចក្តីថ្លែងការណ៍ថា អាកាសយានិកកងទ័ពអាកាសវៀតណាម ២នាក់ បានបាត់ខ្លួន បន្ទាប់ពីលោតឆ័ត្រយោងចេញពីយន្តហោះហ្វឹកហ្វឺនប្រយុទ្ធធុនស្រាល Yak-130 ផលិតដោយរុស្ស៊ី ដែលបានធ្លាក់ នាព្រឹកថ្ងៃពុធ (ទី៦ ខែវិច្ឆិកា) នេះ ក្នុងខេត្ត Binh Dinh ភាគកណ្តាលប្រទេសវៀតណាម។

ក្រសួងបាននិយាយថា ឧបទ្ទវហេតុនេះបានកើតឡើងនៅពេលដែលអ្នកបើកយន្តហោះព្យាយាមចុះចតក្នុងស្ថានភាពអាកាសធាតុលំបាក ដោយបញ្ជាក់ថា ឧបករណ៍ចុះចតមិនអាចបញ្ចេញបានទេ ហើយវិធានការគ្រាអាសន្នដែលធ្វើឡើងដោយអាកាសយានិកមិនទទួលបានជោគជ័យ។  

ក្រសួងបានបន្ថែមថា អ្នកបើកយន្តហោះអាចលោតឆ័ត្រយោងចេញពីយន្តហោះបាន ហើយឥឡូវនេះ កងកម្លាំងទ័ពអាកាស កំពុងសម្របសម្រួលប្រតិបត្តិការស្វែងរក និងជួយសង្គ្រោះទាំងនៅលើអាកាស និងនៅលើដី។

គួរបញ្ជាក់ថា កាលពីឆ្នាំមុន អាកាសយានិកម្នាក់បានបាត់បង់ជីវិត អំឡុងពេលហ្វឹកហាត់ ខណៈព្យាយាមចុះចតយន្តហោះចម្បាំង Su-22 ផលិតដោយរុស្ស៊ី នៅអាកាសយានដ្ឋានមូលដ្ឋានមួយកន្លែង៕